Եվրոպական ակումբները պայքարում են նոր Հենրիխ Մխիթարյանի համար

ԵՐԵՎԱՆ, 10 հուլիսի. /Նովոստի–Արմենիա/. «Շիրակի» երիտասարդ ֆուտբոլիստ Վահան Բիչախչյանը գրավել է եվրոպական ակումբների սկաուտների ուշադրությունը։

Ինչպես հաղորդում է record.pt գործակալությունը, «Բենֆիկա» պորտուգալական ակումբը հետևել է խաղացողին և սպասել, երբ նա կդառնա 18 տարեկան։ Նշենք, որ Բիչախչյանի 18–ամյակը լրացել է նախորդ կիրակի։


Բիչախչյանը 16 տարեկանից սկսել է հանդես գալ պրոֆեսիոնալ մակարդակում և դարձել է ամենաերիտասարդ ֆուտբոլիստը, ով գոլ է խփել Եվրոպա լիգայում։ Նա նաև հավակնում է Golden Boy 2017 (Լավագույն երիտասարդ ֆուտբոլիստ) կոչմանը։

2016 թ.–ի նոյեմբերին Բիչախչյանը մեկշաբաթյա փորձաշրջան է անցել իտալական «Ֆիորենտինայում»։ Նա մարզվել է «Ֆիորենտինայի» երկրորդ թիմում։

2017 թ.–ի ապրիլին ֆուտբոլիստով հետաքրքրվել է նաև Մոսկվայի «ԲԿՄԱ»–ն։

The Guardian հեղինակավոր բրիտանական հրատարակությունն ավելի վաղ Բիչախչյանին ներառել է աշխարհի 60 լավագույն երիտասարդ տաղանդների ցանկում։

Նշվում է, որ որոշ փորձագետների կարծիքով` Բիչախչյանն իր տաղանդով չի զիջում «Մանչեսթեր Յունայթեդի» հայ կիսապաշտպան Հենրիխ Մխիթարյանին, իսկ նրա խաղը հիշեցնում է «Մանչեսթեր Սիթիի» բելգիացի կիսապաշտպան Կևին Դե Բրեյնի խաղաոճը։ –0–