ԵՐԵՎԱՆ, 5 սեպտեմբերի. /Նովոստի–Արմենիա/. Մոսկվայի «Արարատի» գլխավոր մարզիչ Ալեքսանդր Գրիգորյանը հայտնել է, որ ակումբը կդադարի գոյություն ունենալ «Ռյազանի» հետ խաղից հետո, որը տեղի կունենա սեպտեմբերի 8–ին։
«Մեզ հայտարարել են, որ ակումբը փակվում է», – նշել է Գրիգորյանը, հաղորդում է
sport-express.ru–ն։
Նրա խոսքով, «Ռյազանի» հետ խաղը, ամենայն հավանականությամբ, կլինի վերջինը։
«Պատրաստ եմ խոսել պատճառների մասին «Ռյազանի» հետ խաղից հետո նախատեսված ասուլիսի ժամանակ։ Կարծում եմ, որ ակումբը պարզապես չի կարող ավարտել գործունեությունը, հատկապես` «Արարատ» անունով։ Չեմ ուզում, որ այն դադարի գոյություն ունենալ առանց բացատրությունների։ Այդպես չպետք է լինի», – հայտարարել է Գրիգորյանը։
Պատասխանելով այն հարցին, թե ինչպե՞ս կարելի է նման մթնոլորտում պատրաստվել «Ռյազանի» հետ խաղին` Գրիգորյանը նշել է. «Կան հանգամանքներ, իսկ կա «տղամարդիկ» բառը։ Տղամարդիկ դուրս կգան և կխաղան` անկախ հանգամանքներից։ Ես ամեն ինչ կբացատրեմ ասուլիսի ժամանակ»։
Հիշեցնենք, որ ակումբը սկսել է գործել միայն այս սեզոն։ Ակումբում հանդես են գալիս այնպիսի հայտնի ֆուտբոլիստներ, ինչպիսիք են Ռոման Պավլյուչենկոն, Ալեքսեյ Ռեբկոն, Մարատ Իզմայլովը, Իգոր Լեբեդենկոն։ Յոթ տուրից հետո թիմը զբաղեցնում է առաջին տեղը «Կենտրոն» գոտում` վաստակելով 17 միավոր։–0–