ԵՐԵՎԱՆ, 24 հոկտեմբերի. /Նովոստի–Արմենիա/. Հայաստանի հավաքականի և «Մանչեսթեր Յունայթեդի» կիսապաշտպան Հենրիխ Մխիթարյանը դարձել է բրենդ, որի մասին վավերագրական ֆիլմ է նկարահանում «Մանչեսթեր Յունայթեդ» ակումբը։
Ակումբի մամուլի ծառայության հաղորդմամբ, 60 րոպե տևողությամբ վավերագրական ֆիլմը կցուցադրվի ակումբի հեռուստաալիքով։ Ֆիլմում կներկայացվի Մխիթարյանի անցած անհավանական ուղին` հայաստանյան բակերում խաղացած ֆուտբոլից մինչև բարձրագույն ակումբային մակարդակ։ Ֆիլմը պատմում է նաև Հենրիխի 33–ամյա հոր ողբերգական մահվան մասին։ Լեգենդար ֆուտբոլիստի հայրը կյանքից հեռացավ գլխուղեղի ուռուցքի հետևանքով։
Հենրիխի երազանքն էր հետևել հոր օրինակին և դառնալ պրոֆեսիոնալ ֆուտբոլիստ։ Այս ուղղությամբ առաջին քայլերը նա կատարել է «Փյունիկ» ակումբում, երբ ընդամենը 17 տարեկան էր։ Այնուհետև Մխիթարյանը տեղափոխվել է ուկրաինական «Մետալուրգ» և դարձել ակումբի պատմության մեջ ամենաերիտասարդ ավագը։ «Մետալուրգից» հետո Մխիթարյանը տեղափոխվել է «Շախտյոր», որտեղ անցկացրած չորս խաղաշրջաններից հետո տեղափոխվել է «Բորուսիա», որտեղ էլ նրան նկատել է Ժոզե Մոուրինյուն։
Որպես Պրեմիեր–լիգայում հանդես եկող առաջին հայ մարզիկ` Հենոն, ինչպես նրան անվանում են ընկերները, դարձավ Հայաստանի կենդանի լեգենդներից մեկը։ Շատերի համար ֆուտբոլիստի պրոֆեսիոնալիզմն ու ձեռք բերած հաջողությունը դարձան «նոր Հայաստանի» խորհրդանիշերը, նա հայերի ու Հայաստանի իսկական հպարտությունն է։–0–