Ծանրորդ Սիմոն Մարտիրոսյանը դարձավ Եվրոպայի չեմպիոն

ԵՐԵՎԱՆ, 8 ապրիլի. /Նովոստի-Արմենիա/. Շաբաթ հայ ծանրորդ Սիմոն Մարտիրոսյանը Խորվաթիայի Սպլիտ քաղաքում ընթացող ծանրամարտի Եվրոպայի առաջնությունում նվաճեց Եվրոպայի չեմպիոնի տիտղոսը:

Ինչպես հայտնում է ՀԱՕԿ լրատվության բաժինը, ծանրորդը դարձավ չեմպիոն 105 կգ քաշային կարգում: Երկամարտում Մարտիրոսյանը գրանցեց 414 կգ արդյունք (184+230):

Երկրորդ տեղը զբաղեցրել է Բուլղարիան ներկայացնող Վասիլ Գոսպոդինովը (397), երրորդը` լեհ Արկադիուշ Միխալսկին (387):

Այս քաշային կարգում Հայաստանի մյուս ներկայացուցիչ Սամվել Գասպարյանը երկամարտի 375 կգ արդյունքով (165+210) գրավել է 6-րդ տեղը:

Շաբաթ երեկոյան +105 կգ քաշային կարգում հանդես կգան Գոռ Մինասյանը և Ռուբեն Ալեքսանյանը: -0-