ԵՐԵՎԱՆ, 2 մարտի. /Նովոստի Արմենիա/. Երեխաների մասնագիտության հաջող ընտրության գաղտնիքներն է բացել Synopsys Armenia-ի գործադիր տնօրեն Հովիկ Մուսայելյանը` հանդես գալով «Այբ» դպրոցում` «Հաջողության բանաձև» վարպետության դասերի շրջանակում:
Загружается новость ... "Лево"
«Ծնողներից շատերը` պատասխանելով հարցին, թե ինչու են ցանկանում, որ իրենց երեխաները սովորեն ՏՏ ոլորտում, նշում են, որ այն եկամտաբեր է ու այդպես նրանք ապահովում են իրենց երեխաների պայծառ ապագան: Անշուշտ, նման դիրքորոշումը ճիշտ է, սակայն երեխայի համար ապագա մասնագիտություն ընտրելիս պետք է հաշվի առնել ոչ միայն ֆինանսական կողմը, այլ նաև երեխայի ունակությունները», - նշեց Մուսայելյանը:
Միաժամանակ նա նշեց, որ վերջին տարիներին աշխարհում այնպիսի միտում է նկատվում, երբ դպրոցական տարիներում հանրահաշվում ու մաթեմատիկայում հաջողություններ գրանցած երեխաները ավարտելուց հետո ընտրում են հումանիտար մասնագիտություն:
«Դա պայմանավորված է նրանով, որ ուսման տարիների ընթացքում երեխաները հոգնում են ծանրաբեռնվածությունից, ինչպես նաև տարբեր օլիմպիադաներին ու մրցումներին մասնակցելուց, և դպրոցն ավարտելուց հետո բարձր եկամուտը չի կարող ստիպել նրանց ընտրել ՏՏ ոլորտը: Ծնողները պետք է հիշեն դա», - ասաց Մուսաելյանը:
Միաժամանակ Synopsys Armenia ընկերության գործադիր տնօրենը կարծում է, որ ծնողները պետք է կարողանան պահպանել երեխաների զբաղվածության բալանսը` երեխաները ոչ միայն պետք է օգտվեն համակարգչից և ազատ տիրապետեն դրան, այլ նաև շփվեն իրենց հասակակիցների հետ:
«Իհարկե, շատերն ասում են, որ բակային շփումները կարող են վատ ազդեցություն թողնել երեխաների վրա, սակայն միևնույն ժամանակ դա կօգնի իրենց բացել նաև այլ իրականություն, ինչը կարևոր է երեխաների հետագա զարգացման համար», - հայտարարեց Մուսայելյանը:
Synopsys Armenia ընկերությունը /Synopsys Inc–ի մասնաճյուղ/ հայկական շուկա է մտել 2004 թվականի հոկտեմբերին` Leda Design և Monterey Arset ընկերությունների միաձուլման և Synopsys Armenia ԲԲԸ միասնական ընկերության ստեղծման մասին պայմանագրի ստորագրումից հետո։ Ընկերությունը զբաղվում է գիտահետազոտական և ճարտարագիտական աշխատանքներով էլեկտրոնային նախագծման ավտոմատացման, մտավոր սեփականությունների (IР) արտադրության և մշակման նախագծման ոլորտներում։
Synopsys Inc –ը ծրագրային ապահովման, մտավոր սեփականության և ծառայությունների բնագավառի համաշխարհային առաջատար է և ունի մոտ 70 տեղական մասնաճյուղեր Հյուսիսային Ամերիկայում, Եվրոպայում, Ճապոնիայում, Ասիայում և Հնդկաստանում, իսկ գլխամասային գրասենյակը Կալիֆոռնիայում է (ԱՄՆ)։--0—