ԵՐԵՎԱՆ, 8 մայիսի. /Նովոստի–Արմենիա/. Մեր ժողովուրդները խաղաղություն են բերել Եվրոպային և ֆաշիստական օկուպացիայից մի շարք երկրներ են ազատել, ասաց Հայաստանում Ռուսաստանի Արտակարգ և Լիազոր դեսպան Իվան Վոլինկինը հինգշաբթի Երևանում միտինգ–ռեքվիեմի ժամանակ։
Միտինգ–ռեքվիեմը անցկացվել է 1941-1945 թթ. Հայրենական Մեծ պատերազմում Հաղթանակի 69–րդ տարեդարձի առիթով։ Կազմակերպիչներն են` «Ռուսաստանի բարեկամներ» հասարակական կազմակերպությունը` Ռուսաստանի դեսպանության և Հայաստանում Ռոսսոտրուդնիչեստվոյի ներկայացուցչության օժանդակությամբ։
Տոնական միջոցառումն ընթացել է Հրազդանի կիրճում` Խորհրդային Միության հերոսների արձան–աղբյուրների մոտ։ Միջոցառմանը մասնակցել են Հայաստանում Բելառուսի և Ղազախստանի դեսպաններ Ստեպան Սուխորենկոն և Այիմդոս Բոզժիգիտովը, Հայաստանում Ռոսսոտրուդնիչեստվոյի ներկայացուցչության ղեկավար Մարկ Կալինինը, բազմաթիվ հյուրեր։
Հավաքվածները զոհերին հարգանքի տուրք են մատուցել լռության րոպեով։
«Մեր ժողովուրդները դիմակայել են իրենց Հայրենիքի համար արյունահեղ մարտերում, խաղաղություն են բերել Եվրոպային, և բազմաթիվ երկրներ ազատել նացիստական օկուպացիայից»,– ասաց դեսպանը։
Նա նշեց, որ հայ և ռուս ժողովուրդների եղբայրական սերը ռազմական դաժան փորձությունների տարիներին դեպի ապագան նայող ռուս–հայկական անքակտելի դաշնակցային գործընկերության հիմքն է։
Հայաստանում Ռոսսոտրուդնիչեստվոյի ներկայացուցչության ղեկավար Մարկ Կալինինը հայտնել է, որ Հայրենական Մեծ պատերազմի հերոսներին Հրազդանի կիրճում պատվելը բարի ավանդույթ է դարձել։
«Չնայած եղանակային պայմաններին` ամեն տարի այստեղ հավաքվում են երիտասարդներ, վետերաններ, ում թանկ է մեր պապերի հիշատակը»,– ասաց Կալինինը։
Պատերազմի և աշխատանքի վետերանների անունից հավաքվածներին շնորհավորեց Հայաստանում Վետերանների միության նախագահի տեղակալ Միխայիլ Ստեփանյանը։ Նա նշեց, որ իրենց կյանքը հաղթանակի համար տված հերոսներով պետք է հպարտանա յուրաքանչյուր մարդ։
Միջոցառման մասնակիցները ծաղիկներ դրեցին Խորհրդային միության երիտասարդ հերոսների հուշարձան–աղբյուրներին, ինչից հետո կայացավ Հայաստանի Հանրապետության Զինված ուժերի Պատվո պահակախմբի վաշտի հանդիսավոր քայլերթը։
Ավելի ուշ կայացավ տոնական համերգ, բացվեց դաշտային խոհանոց։ Երիտասարդությունը կարողացավ շփվել Հայրենական Մեծ պատերազմի վետերանների հետ։
Հայ ժողովուրդը ռազմաճակատ է ուղարկել վեց համազորային ազգային դիվիզիա՝ Կ. Վորոշիլովի անվան 76-րդ դիվիզիան, որը ստեղծվել էր դեռ 1922 թ.-ի սեպտեմբերին, 408-րդ, 409-րդ, 89-րդ, 390-րդ և 261-րդ դիվիզիաները: Շատ հայեր են մարտնչել 31-րդ, 61-րդ և 320-րդ հրաձգային դիվիզիաների շարքերում, իսկ Թամանյանի հայտնի 89-րդ հայկական դիվիզիան, որը ղեկավարել է լեգենդար հրամանատար Նվեր Սաֆարյանը, մասնակցել է Բեռլինի գրավմանը:
Բացի այդ, հայերը ֆաշիստական Գերմանիայի կողմից օկուպացված տարածքներում մասնակցել են պարտիզանական շարժմանը, ինչպես նաև ակտիվորեն մասնակցել են ինչպես ԽՍՀՄ, այնպես էլ Եվրոպայի տարածքում թշնամու թիկունքում գերմանական զորքերի ջախջախմանը: Այսպես, Ֆրանսիայի ազգային հերոս դարձավ Միսաք Մանուշյանը՝ ֆրանսիական դիմադրության շարժման առաջնորդներից մեկը:
Երկրորդ համաշխարհային պատերազմի մեծ զորավարներից են՝ Խորհրդային Միության երկակի հերոս, մարշալ Հովհաննես Բաղրամյանը, զրահատանկային զորքի գլխավոր մարշալ Համազասպ Բաբաջանյանը,ավիացիայի մարշալ Սերգեյ Խուդյակովը (Արմենակ Համֆերյանց), ԽՍՀՄ նավատորմի ծովակալ Իվան Իսակովը: Հայ ժողովուրդը պատրաստել և ռազմաճակատ է ուղարկվել վեց մոտոհրաձգային դիվիզիաներ: -0-
