482.36
-0.38
568.99
-1.66
8.19
-0.05
+2
Եղանակը Երևանում
Հայ
Գարեգին Երկրորդը հանդիպել է Լատվիայի նախագահի հետ և օծել է Մերձբալթիկայի առաջին հայկական եկեղեցին
13:27
01 Հուլիսի 2011

ԵՐԵՎԱՆ, 1 հուլիսի. /Նովոստի-Արմենիա/. Ամենայն Հայոց Գարեգին Երկրորդ Կաթողիկոսը, ով հովվապետական այցով գտնվում է Ռիգայում, հանդիպել է Լատվիայի Հանրապետության նախագահ Վալդիս Զատլերսի հետ, հաղորդում է Մայր Աթոռ Սուրբ Էջմիածնի տեղեկատվական համակարգը:

«Զրույցի ընթացքում Նորին Սրբությունն իր երախտագիտությունը հայտնեց նախագահին հայ համայնքի հանդեպ Լատվիայի իշխանությունների կողմից ցուցաբերվող մշտական հոգատար վերաբերմունքի և ուշադրության համար», - նշվում է տեղեկատվության մեջ:

Զատլերսն իր հերթին, ողջունելով Ամենայն Հայոց Կաթողիկոսի այցը Ռիգա, բարձր գնահատանքով ներկայացրեց հայ համայնքի կարևոր ներդրումը Լատվիայի կյանքում և շնորհավորեց Նորին Սրբությանը Ս. Գրիգոր Լուսավորիչ եկեղեցու կառուցման և օծման առիթով: 

Օծման արարողությունը, որը գլխավորել է Ամենայն Հայոց Կաթողիկոսը, տեղի է ունեցել նախօրեին Ռուս Ուղղափառ Եկեղեցին ներկայացնող Ալեքսանդր միտրոպոլիտի, Լյութերական Եկեղեցին ներկայացնող Պավել եպիսկոպոսի, քաղաքային իշխանությունների ներկայացուցիչների, ինչպես նաև Էստոնիայից և Լիտվայից ժամանած ուխտավորների ներկայությամբ:

Շարականների, սաղմոսների ու աղոթքների ուղեկցությամբ օծվեցին եկեղեցու զանգակատան խաչը, Ս. Սեղանը և սյուները:

Օծման արարողությունից հետո Նորին Սրբությունն իր օրհնությունն ու պատգամը բերեց ներկա ժողովրդին:

«Ցնծում են այսօր Հայ Առաքելական Սուրբ Եկեղեցին և Լատվիայում բնակություն հաստատած մեր հավատավոր զավակները, քանզի այսօր իր աստվածային օծումն ստացավ Սուրբ Գրիգոր Լուսավորիչ Հայրապետի անունը կրող հոյակերտ այս տաճարը», - ասել է Ամենայն Հայոց Կաթողիկոսը:

Նրա խոսքերով՝ այս Եկեղեցու կառուցումով պիտի նորոգվի լատվիահայ համայնքի հոգևոր-մշակութային կյանքը:

«Աստված, որ բնակվում է մեր հոգիներից ներս, հրաշափառ այս եկեղեցու ներկայությամբ Լատվիայի նվիրական հողում պիտի բնակություն հաստատի լատվիահայ համայնքային կյանքից ներս` հեղելով հայրենասիրության, մարդասիրության և ազգասիրության շնորհները հայորդյաց սրտերում և նրանց ձեռաց ու մտքերի գործերի վրա, քանզի Եկեղեցին, որ օծեցինք Սրբալույս Մյուռոնով և մեր հայրերից ավանդված աղոթքներով, դադարում է միայն նյութական, առարկայական կառույց լինելուց, այն դառնում է ոգեղեն իրականություն», - ընդգծել է Գարեգին Երկրորդը:

Նա նշել է, որ որտեղ էլ հանգրվանել է հայը, իր առաջին մտածումն է եղել եկեղեցի կառուցել:

«Մեր զավակները քաջ գիտակցությունն ունեն այն անհերքելի իրականության, թե քրիստոնեությունն է արտահայտում մեր հոգևոր ինքնությունը, և թե Հայ Առաքելական Եկեղեցին է ձևավորում ազգային քրիստոնեական իր դիմագիծը: Տեսնում ենք, թե ինչպես է հայն իր տունը, եկեղեցին ու դպրոցը կերտել իրեն հյուրընկալած երկրներում և, վայելելով տեղի իշխանությանց բարյացակամ խնամքն ու հոգատարությունը, աստվածապավինությամբ սկսել իր նոր կյանքն ու գործունեությունը որպես արժանավոր, հպարտ քաղաքացի այդ երկրի», - նշել է Գարեգին Երկրորդը:

Ամենայն Հայոց Կաթողիկոսը հորդորել է հայորդիներին քրիստոնեական զորեղ հավատքով և հավատի գործերով շարունակել Լատվիայի նվիրական հողում բարեզարդել իրենց ազգային կյանքը:

Նորին Սրբությունը նորաօծ եկեղեցուն նվիրեց սրբապատկեր: Հավարտ արարողության՝ Ս. Գրիգոր Լուսավորիչ եկեղեցում մատուցվեց անդրանիկ Ս. Պատարագը: Պատարագիչն էր Մայր Աթոռի հրատարակչական բաժնի տնօրեն Տ. Նաթան եպիսկոպոս Հովհաննիսյանը:

Նույն օրը Գարեգին Բ Ամենայն Հայոց Կաթողիկոսը հայրապետական օրհնության գրեր շնորհեց եկեղեցու կառուցման գործում մեծ ավանդ ունեցած բարերարներին` Առնո Տեր-Սահակովին, Արտակ Դանիելյանին, Էդուարդ Տեր-Սահակովին, Ռոբերտ Հովհհանեսյանին, Էռնեստ Բերնիսին, Սերգեյ Ավետիսյանին, Աղան Ավետիսյանին, Արա Դավոյանին, Պավել Սայադովին, Ատոմ Խաչատրյանին, Մխիթար Մխիթարյանին, Վաչագան Պողոսյանին, Արթուր Իսախանովին, Ռուստամ Ասոյանին, Ենոք Կոսյանին և Սուրն Պարսամյանին:

Երեկոյան ի պատիվ Ամենայն Հայոց Կաթողիկոսի՝ համայնքի կողմից տրվեց պաշտոնական ընթրիք, որին մասնակցում էին հայ համայնքի անդամներ, Լատվիայի իշխանությունների և Քույր Եկեղեցիների ներկայացուցիչներ:

Ուրբաթ Ն.Ս.Օ.Տ.Տ. Գարեգին Բ Ծայրագույն Պատրիարք և Ամենայն Հայոց Կաթողիկոսը կվերադառնա Մայր Աթոռ Ս. Էջմիածին:-0-

Loading...
Թեմատիկ նյութեր
Բաժնի այլ նյութեր
20:59
17 Դեկտեմբերի 2017
Հրապարակվել են տարվա լավագույն սերիալները
Հայտնի են տարվա լավագույն սերիալները։
19:40
17 Դեկտեմբերի 2017
Ողջ հմայքով. ի՞նչ հագուստով դիմավորել Շան տարին
Ամանորյա վառ կերպարը տոնական տրամադրության երաշխիքն է։ Մենք պատրաստել ենք մի փոքրիկ «հուշաթերթիկ», որը կօգնի ընտրել անհրաժեշտ կերպարը Դեղին հողե շան տարին դիմավորելու համար։
16:51
17 Դեկտեմբերի 2017
Ընտրվել է տարվա բառը
Օքսֆորդի բառարանն ընտրել է տարվա բառը:
21:05
16 Դեկտեմբերի 2017
Ինչպես նվեր փաթեթավորել արագ և պարզ. ֆոտոուղեցույց
Անկասկած, մենք բոլորս սիրում ենք նվերներ ստանալ:
19:23
16 Դեկտեմբերի 2017
Սնունդն ազդում է մարդու տրամադրության վրա
Պարզվում է` սնունդն ազդում է մարդու տրամադրության վրա։
17:58
16 Դեկտեմբերի 2017
Պարզվել է միկրոալիքային վառարանի նոր վտանգը
Բացահայտվել է միկրոալիքային վառարանի նոր վտանգը:
16:41
16 Դեկտեմբերի 2017
Ինչո՞վ է վտանգավոր քնի պակասը
Պարզվել է` ինչի կարող է հանգեցնել քնի պակասը։
11:48
16 Դեկտեմբերի 2017
Հնդկաձավարով նախաճաշ` արագ նիհարելու համար
Ո՞վ չի ուզում արագ նիհարել և միաժամանակ համեղ սնվել:
17:51
15 Դեկտեմբերի 2017
Santa–ն Հայաստանում. հայ երեխաներն առանձնահատուկ են (ՖՈՏՈ)
Սանտա Կլաուսը ուրբաթ Լապլանդիայից եկել է Հայաստան։
15:53
14 Դեկտեմբերի 2017
Նիկոլ Փաշինյանը բացել է հայկական խորհրդարանի գաղտնիքը (ՖՈՏՈ)
Հայ ընդդիմադիր պատգամավոր, «Ելք» խմբակցության ղեկավար Նիկոլ Փաշինյանը բացել է հայկական խորհրդարանի գաղտնիքը։
20:45
13 Դեկտեմբերի 2017
«ՎԻԱ ԳՐԱ»–ի Բրեժնևան` հայ դիզայների զգեստով (ՎԻԴԵՈ)
«ՎԻԱ ԳՐԱ»–ի նախկին մենակատար Վերա Բրեժնևան ելույթ է ունեցել հայ դիզայներ Հայկ Ավանեսյանի զգեստով «Необыкновенный огонек»–ի ընթացքում։
20:10
13 Դեկտեմբերի 2017
Հազվագյուտ կենդանիներով բացառիկ էկզոտարիում է բացվել Երևանում (ՖՈՏՈ)
«Զուլանդիա» էկզոտարիումը բացումը կայացավ Երևանի «ՌԻՈ» առևտրի կենտրոնում։