ԵՐԵՎԱՆ, 29 օգոստոսի. /Նովոստի-Արմենիա/. Ըստ նախնական տեղեկությունների, սեպտեմբերի 1-ին Հայաստանի դպրոցների առաջին դասարաններ կգնա գրեթե 39 հազար երեխա, չորեքշաբթի լրագրողների հետ զրույցում ասաց կրթության և գիտության նախարար Արայիկ Հարությունյանը:
«Առաջինդասարանցիների վերջնական թիվը պարզ կդառնա սեպտեմբերի 5-ին: Հույս ունենք, որ այդ թիվը կմեծանա, երբ շատ ընտանիքներ կվերադառնան արձակուրդից կամ կտեղափոխվեն Հայաստան` մշտական բնակության», - ասաց Հարությունյանը:
Նա հայտնեց նաև, որ նախարարությունը հաջորդ տարի մտադիր է ներդնել առաջինդասարանցիների առցանց ընդունման համակարգը:
«Ինչպես և Արցախում, ծնողները չեն ընտրելու կոնկրետ դասարաններ, աշակերտների բաշխումը կատարվելու է վիճակահանությամբ: Նույն ձևով կնտրվի ուսուցիչը: Այդ ամենն արվում է «էլիտար» դասարանների ձևավորումը կանխելու նպատակով», - ասաց Հարությունյանը:
Խոսելով մարզային դպրոցներում աշակերտների զգալի պակասի մասին` Հարությունյանը նշեց, որ նախարարությունը փորձում է տեղում զբաղվել այդ խնդրով:
Загружается новость ... "Лево"
«Մենք կարող ենք պայմանավորվել ծնողների և կոլեկտիվների հետ երկու միջնակարգ դպրոց միավորելու մասին: Սակայն մենք չենք կարող գնալ այդ քայլին, եթե, օրինակ, աշակերտների համար կա ուսումնական հաստատության մատչելիության խնդիր: Մեր նպատակն է, որ, մասնավորապես, սահմանամերձ բնակավայրում գործող ոչ մի դպրոց չփակվի», - ասաց Հարությունյանը:
Ըստ նրա, նախարարությունը դիտարկում է որոշ համայնքներում կրթամշակութային համալիրների ստեղծման հնարավորությունը, որոնք կներառեն մանկապարտեզներ, դպրոցներ, ինչպես նաև մշակութային հաստատություններ: Նախարարը չբացառեց նաև, որ դպրոցի մատչելիության հարցը հնարավոր կլինի լուծել հատուկ տրանսպորտային միջոց տրամադրելու միջոցով:-0-
