Մամոգրաֆիկ հետազոտության արդյունքում կանանց մեկ երրորդը ստանում է սխալ ախտորոշում

ԵՐԵՎԱՆ, 11 հունվարի. /Նովոստի-Արմենիա/. Արդեն երկար տարիներ շարունակվում է մամոգրաֆիայի հաճախակի հետազոտությունների շուրջ բանավեճը մասնագետների շրջանում։

Դրան է անդրադարձել դանիական նոր ուսումնասիրությունը, որի արդյունքները հրապարակվել են Annals of Internal Medicine պարբերականում, հաղորդում է amerikayidzayn.com կայքը:

Կատարված ուսումնասիրությունը ներկայացնում է բժշկական հետազոտության արդյունքում ծագող խնդիրները, հատկապես ուռուցքի առաջացման վաղ շրջանում:

Մասնավորապես, նշվում է, որ մամոգրաֆիկ սարքի միջոցով հետազոտված և դրա արդյունքում կրծքի քաղցկեղի ախտորոշում ստացած կանանց մեկ երրորդի ախտորոշումը սխալ է, ինչի հետևանքով էլ նրանք ոչ անհրաժեշտ բուժում են ստանում, քանի որ այդ պահին եղած ուռուցքը աճում է չափազանց դանդաղ և վնաս չի հասցնում օրգանիզմին:

Միաժամանակ, հետազոտության արդյունքներում նշվում է նաև, որ սովորական մամոգրաֆիկ հետազոտությունը չի հայտնաբերում ավելի ծանր դեպքեր:

Մամոգրաֆիկ հետազոտության կողմնակիցները գտնում են, որ այն օգնում է հայտնաբերել ուռուցքը վաղ փուլում և կարող է փրկել կնոջ կյանքը, իսկ հաճախակի հետազոտության ընդդիմախոսները գտնում են, որ ոչ անհրաժեշտ հետազոտության արդյունքում ստացվող ճառագայթումը կարող է վնասել կնոջն ու նոր քաղցկեղ առաջացնել: -0-