ԵՐԵՎԱՆ, 15 հոկտեմբերի. /Նովոստի-Արմենիա/. Հայ գրոսմայստեր, շախմատի աշխարհի կրկնակի գավաթակիր Լևոն Արոնյանը բացառիկ հարցազրույց է տվել Հանրային ռադիոյի տնօրեն Մարկ Գրիգորյանին:
Շախմատիստն անդրադարձել է շախմատում հանդիպող լարվածությանը դիմադրելուն, շախմատային կոնֆլիկտին, շախմատից դուրս կյանքին, երաժշտությանը և պոեզիային:
Խաղի ժամանակ սարսափելի լարվածությունը հաղթահարելու վերաբերյալ հարցին Արոնյանն պատասխանել է, որ եթե կարողանար հաղթահարել, գուցե սխալներ չէր անի, բայց լարվածությանը դիմադրում է, եթե լավ մարզավիճակում է: Գրոսմայստերի համար կարևոր է, բացի շախմատից, ուժեր ունենալը:
«Լարվածության հետ էլ է դժվար, առանց լարվածության էլ: Միշտ հետաքրքիր է՝ կկարողանա՞ս հաղթահարել լարվածությունը, թե՝ ոչ: Միշտ ունենում ենք շրջան, երբ ամեն ինչ ստացվում է, որոշ ժամանակ անց՝ ոչ մի բան չի ստացվում: Բարձրակարգ շախմատիստը, մարզիկը պետք է կարողանա փոխվել, քանի որ հակառակորդները հասկանում են՝ ինչ ես փորձում անել և դրա վրա նրանք աշխատում են: Միշտ պետք է կատարելագործես խաղդ»,- նշել է շախմատիստը:
Ադրբեջանցիների հետ խաղի նկատմամբ հավելյալ լարվածության առկայության վերաբերյալ տրված հարցին Արոնյանը մի դրված է պատմել իր պրոֆեսիոնալ կյանքից. «2003, թե 2004 թվականին Եվրոպայի առաջնությունում էի խաղում, և գիշերը մեկ անց կես ինձ զանգահարեց ադրբեջանցի խաղացողներից մեկի հայրը: Նա խնդրեց, որ հաջորդ օրը իմ և իր որդու միջև կայանալիք խաղն ավարտվի ոչ-ոքի, քանի որ նրանց համար դա կարևոր էր: Ես մերժեցի խնդրանքը, քանի որ չեմ սիրում այդպիսի բաներ: Հաջորդ օրը պարտիան շատ վատ գնաց ինձ համար, պարտության եզրին էի, բայց արդյունքում ոչ-ոքի գրանցվեց»:
Արոնյանը նաև նշել է, որ պարտիան իր համար միանշանակ կոնֆլիկտ է, երբ ամեն քայլով խոսում ես հակառակորդի հետ: Որպես իր առաջին կոնֆլիկտ նա մատնանշել է հասարակական կարծիքի հետ կոնֆլիկտը շախմատի ոլորտում, երբ նա ապացուցել է, որ տարիքը կապ չունի` հաջողության հասնելու և լավագույն շախմատիստների ցանկում հայտնվելու համար:
«Իսկ անցյալի շախմատիստներից ո՞ւմ հետ է Ձեր ամենամեծ կոնֆլիկտը» հարցին ի պատասխան Արոնյանը նշել է Տիգրան Պետրոսյանի անունը, քանի որ իր խաղը հասկանալը շատ բարդ է և իր խաղը ներկայում հեշտ է քննադատելը, որովհետև տեմպային չէ, «ադաջիո» է:
Загружается новость ...
"Право"
Արոնյանը նաև շեշտել է, որ շախմատի ֆանատ է դարձել արդեն բավական լուրջ տարիքում` 26-27 տարեկանում: «Հաճույք էի ստանում, շատ էի սիրում շախմատը, բայց այդ մտքով չէի ապրում: Այդ տարիքում շախմատն ասես դարձավ իմ վանքը, երբ հասկացա – դա իմ կարծիքն էր – որ ծնվել եմ ինչ-որ նպատակի համար»,- ավելացրել է նա:
Մարկ Գրիգորյանի` շախմատից դուրս կյանքի մասին Արոնյանը պատմել է, որ բացի շախմատից, նրա նախասիրություններից է երաժշտությունը, որով զբաղվել է մանուկ տարիներին, մասնավորապես, դաշնամուրի է գնացել, բայց այնուհետև ընտրել է շախմատը: Մարզիկը հատկապես սիրում է դասական երաժշտությունը` Բախ, Բեթհովեն, Շոստակովիչ, Մալեր: Նա նշել է նաև, որ երաժշտությունն օգնում է նրան մարզվելու ժամանակ:
Արոնյանը նաև սիրում է պոեզիա, և հարցազրույցի ավարտին ընթերցել է Արսենի Տարկովսկու «Առաջին ժամադրություններ» («Первые свидания») բանաստեղծությունից մի հատված: -0-