ԵՐԵՎԱՆ, 2 հուլիսի. /Նովոստի-Արմենիա/. Ժողովրդական արվեստի և բնության սիրահարների, առողջ կենսակերպ ունեցողների և բնության «Հայ Բույս» երրորդ միջազգային փառատոնն է անցկացվում Տավուշի մարզում:
Նախօրեին փառատոնը մեկնարկեց Ենոքավան համայնքում:
Շաբաթ օրը փառատոնի մասնակիցներին սպասում էին զանազան միջոցառումներ` բույսերից պատրաստվող զովացուցիչ ըմպելիքների և զարդերի վարպետության դասեր, մրցույթներ, յոգայի պարապմունք, խաղեր, պարեր, տիկնիկային թատրոն, դերբի:
Կիրակի ակտիվ հանգստի սիրահարները կմեկնեն թեմատիկ արշավների և կկարողանան վայելել Տավուշի բնության գեղեցիկ տեսարանները:
Շաբաթ օրը փառատոնի համահիմնադիր Գայանե Չիբուխչյանը պատմեց լրագրողներին, որ մասնակիցների և զբոսաշրջիկների թիվը տարեցտարի ավելանում է:
«Սակայն մենք աշխատում ենք ոչ միայն զբոսաշրջիկների համար, այլ փորձել ենք ստեղծել այնպիսի փառատոն, որը հետաքրքիր կլինի Երևանի և Հայաստանի մարզերի բնակիչներին, մասնավորապես, Տավուշի մարզի քաղաքների և գյուղերի բնակիչներին»,- ասաց նա:
Փառատոնի համահիմնադիր Գայանե Աղայանն իր հերթին նշեց, որ այս տարի փառատոնի անակնկալներից մեկը 10 մետր երկարությամբ և 2 մետր լայնությամբ կտորից պաստառն է, որի վրա ցանկացողները կարող են գրառումներ և պատկերներ, ինչպես նաև ափի հետքը թողնել ներկով:
«Փառատոնի ավարտին մենք կկտրենք այդ պաստառը փոքր մասերի և կբաժանենք մասնակիցներին որպես հիշատակ»,- ասաց Աղայանը:
Ըստ ավանդույթի, փառատոնի մասնակիցները պատրաստեցին և համտեսեցին տարբեր տեսակի պանիրներով, հայկական կանաչեղենով և լավաշով ամենաերկար բրդուճը: Նախորդ տարի դրա երկարությունը կազմել էր 17 մետր, այս տարի գերազանցեց 20 մետրը:
Բրդուճի պատրաստումն ուղեկցվում էր «Տոնացույց» ժողովրդական թատրոնի խմբի կատարած երգերով:
Աղայանի խոսքով, բրդուճի յուրաքանչյուր բաղադրիչ ունի իր նշանակությունը` լավաշը խորհրդանշում է ընտանիքը, կանաչին` վերածնունդը և կյանքը, իսկ տարբեր մարզերում պատրաստված պանիրը` խաղաղությունը և համաձայնությունը:
Փառատոնի առաջին օրն ավարտվեց «Միքայել Ոսկանյան և ընկերներ» երաժշտական բենդի համերգով: -0-
Լուսանկարները` Նարինե Ասլանյանի («Նովոստի-Արմենիա» գործակալություն)
