ԵՐԵՎԱՆ, 15 հունիսի. /Նովոստի-Արմենիա/. Արցախում հնագույն դամբարանի պեղումներ են սկսվում:
Մարտակերտի շրջանի Ծմակահող համայնքի Վաճառի ավերակների վրա կառուցված Սուրբ Ստեփանոսի եկեղեցու մոտակայքում գտնվող V-VI դարերի դամբարանի պեղումները կմեկնարկեն հուլիսի 1-ին, հինգշաբթի լրագրողներին հայտնեց Տիգրանակերտի հնագիտական արշավախմբի ղեկավար, պատմական գիտությունների դոկտոր Համլետ Պետրոսյանը:
Ըստ նրա, պեղումները կանցկացվեն Արցախի պետբյուջեից հատկացրած 17 մլն դրամի շրջանակում, ինչպես նաև մասնավոր ռեսուրսներով:
«Այդ գումարը հնարավորություն կտա Տիգրանակերտում պեղումներ իրականացնել 40-42 օրվա ընթացքում»,- ասաց արշավախմբի ղեկավարը` կարևորելով այս աշխատանքները:
Նրա խոսքով, Սուրբ Ստեփանոսի եկեղեցու դամբարանն ունի արևելյան մուտք, ինչը բնորոշ չէ քրիստոնեական շինությունների համար, որտեղ հիմնական մուտքը միշտ ուղղված է արևմուտքից դեպի արևելք:
«Եթե դամբարանն ունի մեկ մուտք, նշանակում է` այն պետք է լինի արևմուտքից, քանի որ քրիստոնյան շարժվում է արևմուտքից արևելք, որտեղից սպասվում է Քրիստոսի երկրորդ գալուստը»,- պարզաբանեց Պետրոսյանը:
Ինչպես նշեց մասնագետը, Արցախի տարածքում արևելյան մուտքով դամբարանների պեղումներն արդիական են, իսկ հնագետների գլխավոր նպատակը` գաղտնիքը գտնելն է:
Պետրոսյանը նշեց, որ 5-րդ դարի վերջում և 6-րդ դարի սկզբին Կովկասյան Ալբանիայի տիրակալ, Արշակունիների դինաստիայի տասներորդ ներկայացուցիչ` Վաչագան Գ Բարեպաշտը, ում ենթակայության ներքո էին նաև հայկական Ուտիք, Արցախ և Սյունիք նահանգները, ելնելով բացառապես քաղաքական նկատառումներից, ստեղծել է առանձին եկեղեցի, որը պետք է որևէ կերպ տարբերվեր Հայ առաքելական եկեղեցու ավանդական շինություններից:
«Ալբանացի արքան քրիստոնյա էր, խոսում և գրում էր հայերեն: Նա փորձում էր որոշակի առանձնահատկություն հաղորդել իր եկեղեցուն, որն ավելի ուշ երկար ժամանակ ծառայում էր հայ ժողովրդին հատուկ անվան ներքո»,- ասաց փորձագետը:-0-
Ծանոթացեք լուրերին առաջինն ու քննարկեք դրանք մեր Telegram-յան ալիքում