ԵՐԵՎԱՆ, 18 մարտի. /Նովոստի–Արմենիա/. Հղիության արհեստական արգելքին ուղղված կտրուկ քայլերը կարող են լուրջ խնդիրների հանգեցնել, կարծում է փաստաբան Մարինե Ֆարմանյանը։
Ըստ նրա, «Վերարտադրողական առողջության մասին» օրենքի համաձայն, կինն իրավունք ունի ինքնուրույն կարգավորել իր սեռական առողջության և ընտանիքի պլանավորման հարցերը, իսկ հղիության արհեստական ընդհատման արգելքը կարող է բացասական հետևանքների հանգեցնել։
«Խորհրդային տարիներին, երբ հղիության արհեստական ընդհատումն արգելված էր օրենքով, աճել էր հղիների շրջանում մահացության ցուցանիշը (անօրինական աբորտների հետևանքով)»,– ուրբաթ լրագրողներին ասաց Ֆարմանյանը։
Նա ավելացրեց, որ այսօրվա դրությամբ օրենսդրորեն հղիության արհեստական ընդհատումն արգելված չէ, և այն կարելի է դիտարկել որպես կնոջ վերարտադրողական իրավունք։
Իրավաբանը հիշեցրեց նաև, որ նախորդ տարի Հայաստանի կառավարությունը մշակել է նոր օրինագիծ, որն արգելում է սելեկտիվ աբորտները։
«Տվյալ օրինագիծն առայժմ չի հաստատվել Ազգային ժողովում, այնուամենայնիվ, դրա առկայությունն արդեն իսկ ողջունելի է, քանի որ երկրի ժողովրդագրական իրավիճակը վատ վիճակում է։ Այսօր յուրաքանչյուր 100 կնոջը բաժին է ընկնում 114 տղա, և որոշ տվյալներով, արդեն 2060 թվականին դա կարող է լուրջ խնդիրներ առաջացնել»,– նշեց Ֆարմանյանը։
Մանկաբարձ–գինեկոլոգ Լիլիթ Կոջոյանն իր հերթին նշեց, որ հղիությունը պետք է ընդհատվի բացառապես բժշկական ցուցումներով, քանի որ աբորտի բացասական ազդեցությունը կնոջ օրգանիզմի վրա շատ մեծ է։
Մասնավորապես, նրա խոսքով, հղիության առաջին ամիսներին կնոջ օրգանիզմում լուրջ փոփոխություններ են կատարվում, հորմոնալ ամբողջ համակարգը փոխվում է, և հղիության ընդհատման դեպքում այդ բոլոր հորմոնալ փոփոխությունները կարող են կտրուկ հակառակ էֆեկտ ունենալ։
«Դրա հետևանքով կարող է ճարպակալում, վահանաձև գեղձի, դաշտանային ցիկլի խախտումներ առաջանալ»,– նշեց Կոջոյանը, ավելացնելով, որ առաջին հղիության ընդհատումը կարող է ճակատագրական լինել կնոջ համար, քանի որ նա կարող է զրկվել վերարարտադրողության ֆունկցիաներից։
Պաշտոնական տվյալներով, Հայաստանում տարեկան կատարվում է 1300 աբորտ։ -0-
Ծանոթացեք լուրերին առաջինն ու քննարկեք դրանք մեր Telegram-յան ալիքում