Հայտնի է ռեփեր Դեցլի մահվան նախնական պատճառը. հարազատները զարմացած են

ԵՐԵՎԱՆ, 5 փետրվարի. /Նովոստի–Արմենիա/. 35–ամյա ռեփեր Կիրիլ Տոլմացկու (Դեցլ) մահվան պատճառը պարզելու փորձաքննությունը կատարվել է Ուդմուրտիայի Հանրապետության «Դատաբժշկական փորձաքննության բյուրոյում», հայտնում է riafan.ru–ն։

Դաշնային լրատվական գործակալության աղբյուրի տեղեկացմամբ, փորձաքննությունը հստակ պատկեր չի տվել, այդ իսկ պատճառով կատարվածի նախնական պատճառը սրտի պաթոլոգիան է։

Միաժամանակ, Կիրիլի մտերիմները պնդում են, որ նա երբեք առողջական խնդիրներ չի ունեցել։

«Վերցվել են բոլոր հնարավոր անալիզները` ալկոհոլի, թունավոր նյութերի պարունակության։ Մինչև չանցկացվի ամբողջական անալիզ, պատճառը պարզել հնարավոր չէ։ Նախնական ախտորոշումը` մահ սրտի պաթոլոգիայի հետևանքով։ Բայց միաժամանակ փորձաքննությունը ցույց է տվել, որ արտահայտված փոփոխություններ չկան»,– պատմել է քննության աղբյուրը։

Աղբյուրի հաղորդմամբ, բժիշկները պնդում են, որ սա հաստատ սրտի կաթված կամ արյունազեղում չէ։ Չի բացառվում կողմնակի նյութերի ազդեցությունը սրտի վրա։

Դեցլը մահացել է կիրակի լույս գիշերն Իժևսկի գիշերային ակումբում։ Նստել է բազկաթոռին և մահացել։ Մահվան փաստով կատարվում է ստուգում։ -0-