ԵՐԵՎԱՆ, 17 հոկտեմբերի. /Նովոստի–Արմենիա/. Երևանի քաղաքապետ Հայկ Մարությանը հանդիպել է Փարիզի քաղաքապետ Անն Իդալգոյի հետ, հայտնում է քաղաքապետարանի մամուլի ծառայությունը։
Քաղաքապետ Մարությանն աշխատանքային այցով գտնվում է Փարիզում։
Ինչպես նշվում է հաղորդման մեջ, Անն Իդալգոն շնորհակալություն է հայտնել Երևանի քաղաքապետին հրավերն ընդունելու համար և շնորհավորել է նրան քաղաքապետի պաշտոնում ընտրվելու առթիվ՝ հաջողություններ մաղթելով գործընկերոջը պատասխանատու աշխատանքում:
Շնորհակալություն հայտնելով հրավերի, շնորհավորանքի և ջերմ ընդունելության համար` Երևանի քաղաքապետն առանձնակի կարևորել է երկու մայրաքաղաքների միջև բարեկամական և գործընկերային կապերի ամրապնդումը՝ նկատելով, որ երկկողմ կոնկրետ ծրագրերի մշակման ու ամենատարբեր ոլորտներում համագործակցության համար առկա է լայն դաշտ:
Կողմերն անդրադարձել են նաև Փարիզում «Թումո» կենտրոնի ստեղծմանը և նկատել, որ այն երկու մայրաքաղաքների միջև հաստատված համագործակցության լավագույն օրինակներից է:
Փարիզի քաղաքապետը մեկ անգամ ևս պատրաստակամություն է հայտնել երկու մայրաքաղաքների միջև առկա փոխգործակցության ուղղություններն ընդլայնելու հարցում:
Նույն օրը Երևանի և Փարիզի քաղաքապետները մասնակցել են Փարիզում «Թումո» կենտրոնի բացման արարողությանը։
«Իմ պարտքը համարեցի անպայման ներկա գտնվել Փարիզում «Թումոյի» պատանիների համար առաջին թվային ստեղծագործությունների դպրոցի բացմանը, քանի որ այն Երևանի ներդրումն է Փարիզում, Երևանի և հայկական ստեղծագործ մտքի ապրանքանիշի ներկայությունն է Փարիզում»,– ասել է Երևանի քաղաքապետը կենտրոնի բացման արարության ժամանակ։
Փարիզի քաղաքապետ Անն Իդալգոն իր հերթին ասել է, որ երկու տարի առաջ Երևան կատարած պաշտոնական այցի շրջանակներում ծանոթանալով «Թումո» կենտրոնի գործունեությանը՝ հաստատապես համոզվել է, որ Փարիզին ևս անհրաժեշտ է նման կենտրոն, որը հայ-ֆրանսիական բազմակողմ համագործակցության ևս մեկ խորհրդանիշ էր դառնալու: -0-