Հայաստանը բարելավել է «Խաղաղասիրության գլոբալ ինդեքսի» իր դիրքերը

ԵՐԵՎԱՆ, 12 հունիսի./Նովոստի–Արմենիա/. Խաղաղասիրության 2019 թվականի գլոբալ ինդեքսում (Global Peace Index) Հայաստանը զբաղեցրել է 118-րդ հորիզոնականն աշխարհի 163 երկրների թվում` բարելավելով իր դիրքը երեք կետով նախորդ տարվա հետազոտության համեմատ:

Խաղաաղասիրության գլոբալ ինդեքսն աշխարհի երկրների խաղաղասիրությունը բնութագրող համալիր ցուցանիշ է, որտ չափվում է պետության ներսում բռնության մակարդակի և նրա արտաքին քաղաքականության ագրեսիվության մակարդակի չափման միջոցով:

Զեկույցի համաձայն, Հայաստանը տեղավորվել է Թաիլանդի (116 տեղ) և Քենիայի (119 տեղ) միջև: Միաժամանակ Հայաստանը շարունակում է մնալ խաղաղասիրության միջին մակարդակ ունեցող երկրների ցուցակում` հանրապետությունը քարտի վրա պատկերված է դեղին գույնով:
Հետազոտության համաձայն, «Ռուսաստան և Եվրասիա» տարածաշրջանում, որտեղ մտնում է 12 երկիր, Հայաստանն իններորդ հորիզոնականում է: Այդ տարածաշրջանում, մասնավորապես, առաջին երեք տողերը զբաղեցնում են Ղազախստանը (64), Մոլդովան (68) և Ղրղըզստանը (95), նրանց հետևում են` Բելառուսը (97), Վրաստանը (99), Ուզբեկստանը (102), Տաջիկստանը (105) և Թուրքմենստանը (115): Տարածաշրջանային այս խմբի աութսայդերներն են` Ադրբեջանը (130), Ուկրաինան (150) և Ռուսաստանը (154):

Իսլանդիան մնում է ամենախաղաղասեր երկրիրը 2008 թվականից: Նոր Զելանդիան, Պորտուգալիան, Ավստրիան և Դանիան նույնպես ամենախաղաղասեր երկրների հնգյակում են: Պակաս խաղաղասեր են Աֆղանստանը, Սիրիան, որն առաջին անգամ երկար տարիների ընթացքում վերջին տեղից բարձրացել է նախավերջին, ինչպես նաև Հարավային Սուդանը, Յեմենը և Իրաքը:

Խաղաղասիրության գլոբալ ինդեքսը ցույց է տալիս, թե որ պետություններն է կարելի համարել առավել անվտանգ (և հակառակը` վտանգավոր) մարդու կյանքի համար: Հետազոտությունն իրականացնում է Էկոնոմիկայի և խաղաղության միջազգային ինստիտուտը (The Institute for Economics and Peace): -0-