Գրիպը 1 օրում բուժող դեղամիջոց է ստեղծվել

ԵՐԵՎԱՆ, 8 մարտի./Նովոստի–Արմենիա/. Shionogi ճապոնական դեղագործական ընկերությունը մշակել է բալոկսավիր–մարբոկսիլ դեղամիջոցը, որի մեկ չափաբաժինը բուժում է գրիպը մեկ օրում։ Դեղորայքը դեռ շուկայում չի հայտնվել, սակայն դրա արդյունավետությունն ապացուցվել է կլինիկական փորձարկումների արդյունքում։

Ինչպես հաղորդում է Lenta.ru–ն, հղում անելով Science Alert–ին, մասնագետները կատարել են պատահականության սկզբունքով կրկնակի «կույր» պլացեբո-վերահսկիչ CAPSTONE-1 փորձը, որին մասնակցել է գրիպով հիվանդ 1436 մարդ։ Նման փորձի դեպքում ոչ միայն հիվանդները, այլև փորձարկողները չգիտեն, թե որ խմբում է օգտագործվում այս կամ այն դեղորայքը։

Կամավորներին պատահական սկզբունքով բաշխվել են 3 խմբի. մեկում հիվանդները մեկ անգամ ընդունել են 40-80 միլիգրամ բալոկսավիր–մարբոկսիլ, երկրորդ խմբում մարդիկ հինգ օր բուժվել են 75 միլիգրամ օսելտամիվիրով, իսկ երրորդում ընդունել են պլացեբո (վերահսկիչ խումբ)։

Արդյունքները ցույց են տվել, որ գրիպով հիվանդների թիվն առաջին խմբում զգալիորեն նվազել է` երկրորդ խմբի համեամտ։ Միաժամանակ, օրգանիզմում վիրուսի ոչնչացման համար պահանջվել է 24 ժամից մի փոքր ավել։ Օսելտամիվիրի դեպքում պահանջվել է 72 ժամ, իսկ պլացեբոյի դեպքում`96 ժամ։ Բացի այդ, նոր դեղորայքով բուժումը հանգեցրել է բարդությունների ռիսկի նվազման։

Shionogi ընկերությունը բալոկսավիր–մարբոկսիլի վաճառքի հավանության հայտ կներկայացնի այս տարի։ Ակնկալվում է, որ դեղամիջոցը հասանելի կլինի 2019 թ.–ից։–0–