ԵՐԵՎԱՆ, 29 մայիսի. /Նովոստի –Արմենիա/. Մարզամշակութային շուրջ 60 միջոցառումներ կանցկացվեն Երևանում «Երևանյան ամառ 2017» ծրագրի շրջանակում, հայտնեց Երևանի քաղաքապետարանի արտաքին ձևավորման և գովազդի վարչության պետ Արազ Բաղդասարյանը։
««Երևանյան ամառ» մարզամշակութային ավանդական ծրագիրը մեկնարկում է հունիսի 1–ից։ Արդեն հինգ տարի անընդմեջ Երևանի քաղաքապետարանը քաղաքապետ Տարոն Մարգարյանի նախաձեռնությամբ իրականացնում է այդ միջոցառումը, և մեր բոլոր հարցումները ցույց են տվել, որ այն սիրված իրադարձություն է դարձել ինչպես երևանցիների, այնպես էլ քաղաքի հյուրերի համար»,– երկուշաբթի ասաց նա մամուլի ասուլիսում։
Բաղդասարյանի խոսքով, ծրագրում ընդգրկված են մշակութային, մարզական և կրթական միջոցառումներ տարիքային բոլոր խմբերի և ամենատարբեր ճաշակի և նախասիրությունների մարդկանց համար։
Երևանի քաղաքապետարանի մշակույթի և զբոսաշրջության վարչության պետ Ռուբեն Հովհաննիսյանն ավելացրեց, որ այս տարի մայրաքաղաքում, բացի ավանդական փառատոներից, կկազմակերպվեն նաև նորերը։
Загружается новость ... "Лево"
«Երեք ամիսներին նախատեսված բոլոր միջոցառումների թվում ավելի քան 10–ը փառատոներ են։ Բացի ձմերուկի, գարեջրի և հայկական կերակրատեսակների ավանդական փառատոներից, կկազմակերպվեն նաև պաղպաղակի փառատոն և տնային կենդանիների առաջին ցուցադրական մրցույթ–փառատոնը»,– ասաց նա։
Այս տարի առաջին անգամ կկայանա Սպորտային մեքենաների առաջին մրցաշարը, որը կանցկացվի հունիսի 4–ին։ Սպորտի սիրահարների համար կկազմակերպվեն առողջ կենսակերպի փառատոն, գունեղ վազք, «Երևան դրիֆթինգ» ավտոշոու, ինչպես նաև հաշմանդամություն ունեցող մարդկանց առաջին սպարտակիադան։ -0-