ԵՐԵՎԱՆ, 21 փետրվարի. /Նովոստի–Արմենիա/. Դուբայի Cayan Group դեվելոփեր–ընկերությունը շարունակում է իրավաբանական հետապնդումը ռուսաստանցի մոդելի նկատմամբ, ով վառ կադրերի համար առանց անվտանգության միջոցների օգտագործման «կախվել է» Cayan Tower երկնաքերի կտուրից, ՌԻԱ Նովոստիին են հայտնել ընկերությունից։
Instagram–ում ավելի վաղ հայտնվել է 23–ամյա Վիկտորիա Օդինցովայի տեսանյութը։ Տեսանյութում երևում է, թե ինչպես է աղջիկը կանգնել 73–հարկանի երկնաքերի բետոնային սալաքարի վրա և հենվել դեպի ներքև` երիտասարդի ձեռքից բռնված։ Այնուհետև Օդինցովան իջել է սալաքարից և, բռնելով տղամարդու ձեռքը, կախվել։ Կիրակի Դուբայի ոստիկանությունը կանչել է աղջկան, որ վերջինս խոստման ստորագրություն տա իր կյանքը ռիսկի չենթարկելու վերաբերյալ։
«Մենք չենք կարող ազատել տիկին Օդինցովային պատասխանատվությունից իր անպատասխանատու գործողությունների համար»,– հայտնել են ընկերությունում։ Հաղորդման համաձայն, նա նաև կվերանայի երկնաքերում անվտանգության համակարգերն այնպես, որ նմանատիպ միջադեպեր այլև չկրկնվեն։
«Անհապաղ իրավական ընթացակարգ է գործարկվել այս միջադեպի առթիվ, և այն կանդրադառնա բոլոր օրինախախտներին բոլոր մակարդակներում»,– ասվում է հաղորդման մեջ։ -0-