ԵՐԵՎԱՆ, 4 հոկտեմբերի. /Նովոստի-Արմենիա/. Բրիտանահայ սկսնակ դիզայներ Սիրան Մանուկյանի առաջին փարիզյան նորաձևության շնորհանդեսը նորաձևության մայրաքաղաքում համախմբել էր տարբեր երկրների մի շարք աստղերի:
Ինչպես հաղորդում է Tatler ամսագիրը, Մանուկյանը ծնվել է Լոնդոնում, ապրում է Բրիտանիայի մայրաքաղաքում, Լոս Անջելեսում և Մոնակոյում, իսկ անվանական Siran ապրանքանիշի առաջին հավաքածուն ցուցադրել է Փարիզում:
Սկսնակին աջակցելու էր եկել ընկերների միջազգային մի թիմ. շնորհանդեսին ներկա էին ռուս մոդել Նատալյա Վոդյանովան, պորտուգալուհի մոդել Սարա Սամպայոն, գերմանուհի Թոնի Գարրն և Էլթոն Ջոնի ամուսին Դևիդ Ֆերնիշը, ով ժամանել էր անմիջապես Մեծ Բրիտանիայից:
Վերարկուների և բոլոր առիթների համար նախատեսված էլեգանտ զգեստների ցուցադրությանը ներկա էին նաև Սիրանի հայրենակիցներ Էմիլիա Կազանջյանը և Քիմ Քարդաշյանը:
Վերջինս միանգամից ընտրել է տրիկոտաժե փուլովեր և խոստացել է դիզայներին արագ ճանաչում: Իսկ Քիմին կարելի է վստահել: Նրանից լավ ո՞վ գիտի, որ աշխարհով մեկ ճիշտ կապեր ունենալը հաջողության կեսն է: -0-