ԵՐԵՎԱՆ, 22 նոյեմբերի. /Նովոստի–Արմենիա/. Երևանում շուտով կավելանա հեծանվուղիների թիվը, չորեքշաբթի հայտնեց Հայաստանի ճանապարհային ոստիկանության պետ Եգոր Կարապետյանը։
«Հեծանիվները մայրաքաղաքի կենտրոնը բեռնաթափելու հիանալի միջոց է։ Այդ իմաստով անհրաժեշտ է ավելացնել հեծանվուղիների թիվը, և դա կիրականացվի»,– ասաց Կարապետյանը։
Նա նշեց, որ Երևանում հեծանվուղիների թվի ավելացման նախագծով այս փուլում զբաղվում է Ճանապարհային ոստիկանությունը։ Աշխատանքների ավարտին այն կիրականացվի, ինչը թույլ կտա բեռնաթափել ոչ միայն Երևանի կենտրոնը, այլ նաև կնպաստի մայրաքաղաքի ավտոերթևեկության ընդհանուր բեռնաթափմանը։
Կարապետյանի խոսքով, մայրաքաղաքի բեռնաթափման անհրաժեշտությունը հատկապես սուր է զգացվում վերջին տարիներին, քանի որ երկիր ներկրված մեքենաների կեսը շահագործվում է հենց Երևանում, ինչը բարդացնում է երթևեկությունը։
«Վերջին տարիներին երկիր է ներկրվել 300 հազար ավտոմեքենա, որոնց կեսն այսօր շահագործվում է Երևանում, ինչն ինքնին բարդացնում է ավտոտրանսպորտի տեղաշարժումը։ Երթևեկության բեռնաթափմանն ուղղված ցանկացած նախաձեռնություն ողջունելի է և ակտիվ կյանքի է կոչվում»,– նշեց Կարապետյանը։
Նա հայտնեց նաև, որ մայրաքաղաքի լայն մայթերին հեծանվորդները կկարողանան «հարևանություն անել» հետիոտների հետ։ -0-
Ծանոթացեք լուրերին առաջինն ու քննարկեք դրանք մեր Telegram-յան ալիքում