ԵՐԵՎԱՆ, 4 մայիսի. /Նովոստի-Արմենիա/. Ամերիկայի հայկական ազգային կոմիտեն պահանջում է ԱՄՆ-ի իշխանություններից դատապարտել թուրքական խորհրդարանի հայազգի պատգամավոր Գարո Փայլանի վրա կատարած հարձակումը, հաղորդում է
Horizonweekly կանադական օնլայն պարբերականը։
Երկուշաբթի համացանցում հայտնվել է թուրքական խորհրդարանում տեղի ունեցած քաշքշուկի տեսանյութը: Կադրերում երևում է, որ Փայլանը (ով ավելի վաղ ելույթ է ունեցել Հայոց ցեղասպանության մասին հայտարարությամբ) պաշտպանվում է իր վրա հարձակվող պատգամավորներից` մինչև նրան օգնության են հասնում իր համակուսակիցները (Ժողովուրդների դեմոկրատական կուսակցություն):
ԱՀԱԿ-ում հիշեցրել են Հրանտ Դինքի ողբերգական ճակատագրի մասին, որին ևս, չնայած կազմակերպության բոլոր կոչերին, ամերիկյան վարչակազմը չի օժանդակել: «Եվ միայն Դինքի սպանությունից հետո է ԱՄՆ-ի կառավարությունը հայտարարություն արել` դատապարտելով սպանությունը, որը նա չի կանխարգելել», - նշվում է հաղորդագրության մեջ:
«Եկե´ք այնպես անենք, որ նման ճակատագիր չունենա նաև ճշմարտություն փնտրող և խաղաղապահ Գարո Փայլանը, ով արժանի է օժանդակության, այլ ոչ թե ամերիկացի ազգի ընտրված ներկայացուցիչների լռությանը», - ասվում է հաղորդագրության մեջ:
Թուրք-հայկական «Ակոս» (Agos) շաբաթաթերթի գլխավոր խմբագիր Հրանտ Դինքը (Hrant Dink) սպանվել է 2007 թվականի հունվարի 19-ին 17-ամյա ազգայնական Օգյուն Սամաստի կողմից ՝ Ստամբուլում, իր գրասենյակի մոտ: Սամաստը ձերբակալվել է սպանությունից մեկ օր անց և 2011 թ.-ին դատապարտվել 22 տարվա և 10 ամսվա ազատազրկման: Դինքի սպանությունը մեծ ռեզոնանս առաջացրեց Թուրքիայում: Նրա հուղարկավորման արարողությունը վերածվել էր բազմահազարանոց ցույցի, որին մասնակցել են մի շարք երկրների և միջազգային կազմակերպությունների ներկայացուցիչներ:
Հայոց ցեղասպանությունը ХХ դարի առաջին ցեղասպանությունն է։ Թուրքիան ավանդաբար մերժում է Առաջին համաշխարհային պատերազմի տարիներին շուրջ մեկուկես միլիոն հայերի զանգվածային ջարդեր իրականացնելու մեղադրանքները և չափազանց ցավագին է վերաբերվում Արևմուտքի քննադատություններին։
Հայոց ցեղասպանության փաստը ճանաչել են բազմաթիվ երկրներ, մասնավորապես` Ուրուգվայը, Լիտվան, Ռուսաստանը, Ֆրանսիան, Իտալիայի խորհրդարանի ստորին պալատը, Գերմանիան, Հոլանդիան, Սլովակիան, Շվեդիան, Շվեյցարիան, ԱՄՆ 42 նահանգներ, ինչպես նաև Հունաստանի, Կիպրոսի, Արգենտինայի, Բելգիայի, Ուելսի, Լյուքսեմբուրգի խորհրդարանները, Կանադայի խորհրդարանի համայնքների պալատը և Լեհաստանի սեյմը, Պարագվայի Սենատը,Վատիկանը, Եվրախորհդարանը, Եկեղեցիների համաշխարհային խորհուրդը։ -0-