ԵՐԵՎԱՆ, 26 հոկտեմբերի. /Նովոստի–Արմենիա/. Արդեն աշուն է, և, բնականաբար, ակտիվանում են վիրուսներն ու սուր շնչառական հիվանդությունները։ Թվում է, թե անհնար է խուսափել հիվանդանալուց, դա հատկապես վերաբերում է մանկահասակ երեխաներին, որոնց իմունային համակարգը դեռ շատ խոցելի է։ Բազմաթիվ մայրիկների կողմից սիրված և հայտնի մանկաբույժ
Եվգենի Կոմարովսկին ներկայացնում է տասը պարզ խորհուրդներ և կանխարգելիչ միջոցառումներ, որոնք կօգնեն խուսափել վիրուսներից և մրսածությունից։
Եվ այսպես...
1. Փոքրաթիվ մարդիկ նշանակում է հիվանդանալու փոքր հավանականություն։ Խուսափե՛ք մարդաշատ վայրերից։
2. Բաց երկնքի տակ վիրուսների կոնցենտրացիան հազարավոր անգամ քիչ է, քան ցանկացած փակ տարածքում, լինի դա բնակարան, դպրոցական դասարան, թե
մետրոյի վագոն։ Հարյուր անգամ մտածեք` արդոք չե՞ք կարող խուսափել նման վայրերից։
3. Որքան մոտ եք կանգնած մարդուն, այնքան ավելի մեծ է վարակվելու հնարավորությունը։ Եթե նկատում եք սուր շնչառական վիրուսային ինֆեկցիայի նախանշաններ ունեցող մարդու (հազ, փռշտոց, հարբուխ), պահպանե՛ք հեռավորություն։
4. Հիվանդի ձեռքերն ինֆեկցիայի աղբյուր են։ Նվազագույնի հասցրեք ձեռքսեղմումները։ Առանձնահատուկ ուշադրություն դարձրեք դռների բռնակներին և քաղաքային տրանսպորտի բռնակներին։
5. Վիրուսներին «հանդիպելու» հնարավորություններն ավելանում են այնտեղ, որտեղ կան շատ երեխաներ և այնտեղ, որտեղ շատ են հիվանդները։ Այդ պատճառով առանձնահատուկ զգոնություն դրսևորեք մանկական պոլիկլինիկաներ այցելելիս։
6.Վիրուսային մասնիկները ժամերով և օրերով պահպանում են իրենց ակտիվությունը փոշոտ, չոր, տաք օդում և գրեթե ակնթարթորեն «մահանում են» մաքուր, զով, խոնավ օդում։ Այդ պատճառով հաճախ օդափոխեք տարածքը։
7. Բնակելի տարածքների համար օդի օպտիմալ պարամետրերն են` ջերմաստիճան` 16–22°С, օդի հարաբերական խոնավություն` 40–70%։ Ստեղծեք հարմարավետ պայմաններ այս չափանիշներով։ Եթե մրսում եք, ապա տաք հագնվեք։
8. Լվացեք ձեռքերը։ Եթե հնարավորություն չունեք, օգտագործեք խոնավ հիգիենիկ և ախտահանիչ անձեռոցիկներ կամ քսուքներ։
9. Խոնավացրեք շնչուղիների լորձաթաղանթը։ Հաճախ օգտագործեք աղային լուծույթների հիման վրա պատրաստված քթի կաթիլներ։ Ողողեք բերանը սովորական
ջրով։ Աղային լուծույթը կարող եք ինքնուրույն պատրաստել` 1 թեյի գդալ աղին ավելացնելով 1 լիտր եռացրած ջուր։
10. ՍՇՎԻ–ի հավանականությունը նվազեցնում է լիարժեք սնունդը, ակտիվ կենսակերպը, լիարժեք քունը, ժպիտն ու բարձր տրամադրությունը։
Եվ վերջում անհրաժեշտ է նշել, որ դիմակը չի «փրկի» առողջին, և այն պետք է կրի հիվանդը` նման կերպով փոքր–ինչ նվազեցնելով վարակվելու հավանականությունը։
ՍՇՎԻ–ի հավանականությունն նվազեցնող դեղորայք գոյություն չունի։-0-
