ԵՐԵՎԱՆ, 1 հուլիսի./Նովոստի–Արմենիա/. Բժշկական գիտությունների դոկտոր, պրոֆեսոր, բժիշկ–դիետոլոգ Ալեքսեյ Կովալկովն իր Instagram–ում խորհուրդ է տվել` ինչպես մթերք ընտրել խանութում։
Նա ընդգծել է, որ սուպերմարկետներում շատ է վնասակար մթերքը, գրում է mk.ru-ն։
Առաջին հերթին պետք է խուսափել մեծ քանակությամբ նատրիումի գլուտամատ պարունակող մթերքներից։ Այդ հավելումն առաջացնում է կախվածություն, հատկապես դա վերաբերում է երեխաներին։ Նատրիումի գլուտամատով մթերքներ ուտելուց հետո տանը պատրաստած կերակուրն անհամ է թվում։
Загружается новость ... "Лево"
Պետք է նաև հրաժարվել ցածր յուղայնությամբ կաթնամթերքից։ Օրինակ, թթվասերը չի կարող լինել 25%–ից պակաս յուղայնությամբ։ Շատ կաթնամթերքներ ունեն ցածր յուղայնություն, քանի որ դրանց մեջ ավելացնում են բուսական ճարպեր, սոյա և այլ հավելումներ։
Պետք է խուսափել նաև խմորիչով պատրաստվող թխվածքից։ Կարելի է գնել առանց խմորիչի հաց կամ ինքնուրույն պատրաստել թխվածքաբլիթներ։
Վնասակար է նաև շաքարավազի բարձր պարունակությամբ մթերքը։ Դա նաև վերաբերում է շաքարի փոխարինիչներին։
«Պետք է օգտագործել նվազագույն ածխաջրեր», – ընդգծել է Կովալկովը։
Բացի այդ, նա խորհուրդ տվեց չգնել հավ խանութից, «քանի որ այն պարունակում է աճի խթանիչներ, ջուրը պահող պրեպարատներ և հակաբիոտիկներ»։
Նա նաև զգուշացրել է, որ այս ամենը մնում է մեր օրգանիզմում։–0–