ԵՐԵՎԱՆ, 16 ապրիլի. /Նովոստի–Արմենիա/. Բրիտանացի և չինացի բժիշկներն ապացուցել են, որ թարմ մրգերի օգտագործումը կապված է դիաբետի զարգացման ցածր ռիսկի և դրա բարդացումների հետ։
Ինչպես հաղորդում է
Lenta.ru–ն, համապատասխան ուսումնասիրությունը հրապարակվել է PLOS Medicine ամսագրում։
Մեծ քանակությամբ թարմ միրգ օգտագործող մարդիկ ավելի հազվադեպ են բախվում դիաբետի և դրա բարդացումների հետ։ Այդ մարդկանց մոտ հիվանդության զարգացման հավանականությունը հինգ տարում նվազում էր միջինը 0,2 տոկոսով։ Դիաբետ ունեցող մարդկանց մոտ, ովքեր շատ միրգ են օգտագործում, այդ հիվանդությունից մահանալու ռիսկը հինգ տարում նվազում էր 1,9 տոկոսով։
Մասնագետները նման եզրահանգման են եկել` յոթ տարվա ընթացքում հետևելով 500 հազար մարդու կենսակերպին, ովքեր գրանցված են CKB–ի (China Kadoorie Biobank) բազայում։ Գիտնականները հետևում էին դիաբետով հիվանդ մարդկանց վիճակին, ինչպես նաև արձանագրում էին հիվանդության նոր դեպքեր։
Հեղինակների խոսքերով, չնայած, որ գոյություն ունեն բազմաթիվ ուսումնասիրություններ, որոնք նվիրված են առողջության վրա թարմ մրգերի օգտագործման ազդեցության ուսումնասիրությանը, նրանց հետազոտությունն առաջինն է, որի ուշադրության կենտրոնում եղել է բացառապես դիաբետն ու դրա բարդացումները։ Գիտնականները նշում են, որ ուսումնասիրության արդյունքները հիմնականում վերաբերում են Ասիայի բնակիչներին, որտեղ դիաբետի դեպքում մարդիկ ավանդաբար սկսում են օգտագործել քիչ մրգեր։–0–