ԵՐԵՎԱՆ, 15 օգոստոսի./Նովոստի–Արմենիա/. Ամռանը բնության գրկում և լողափերում հանգիստը նախընտրողները պետք է հետևեն մի քանի պարզ կանոնների` առողջության հետ կապված անախորժ հետևանքներից խուսափելու նպատակով:
ՀՀ առողջապահության նախարարությունը ներկայացնում է մի քանի պարզ կանոն, որոնց հետևելու դեպքում բնության գրկում կազմակերպված հանգիստը կանցնի առանց հետագա առողջական խնդիրների։
Եվ այսպես...
Անհրաժեշտ է շուտ փչացող մթերքը տեղափոխել և պահել սառնարան-պայուսակներում։ Խորհուրդ չի տրվում գնել անհայտ ծագման միս-մսամթերք և շուտ փչացող այլ մթերք այն վայրերից, որոնք նախատեսված չեն առևտրի համար և չունեն համապատասխան ուղեկցող փաստաթուղթ: Խորհուրդ չի տրվում նաև վերցնել կաթնամթերք, ապխտած մթերք, ձու և կրեմային հրուշակեղեն, քանի որ դրանք նպաստավոր միջավայր են մանրէների բազմացման համար:
Բնության գրկում հանգստանալիս անհրաժեշտ է խմելու համար օգտագործել շշալցված ջուր, կերակրատեսակների պատրաստման ժամանակ հում և պատրաստի մթերքների համար օգտագործել առանձին խոհարարական պարագաներ՝ դանակներ, ափսեներ, տախտակներ: Շատ կարևոր է հետևել, որպեսզի մսամթերքից և այլ հում մթերքից հոսող հեղուկը չաղտոտի պատրաստի սննդատեսակները (աղցաններ, միրգ և բանջարեղեն և այլն):
Խորհուրդ է տվում ամբողջ սնունդը, մինչև ուտելը, ուտելու ժամանակ և հետո պաշտպանել միջատներից, կրծողներից և այլ կենդանիներից, որոնք հիվանդածին մանրէների փոխանցողներ են: Հարկավոր է սնունդը պահել լավ փակվող տարաներում կամ փաթեթավորել պոլիէթիլենային թաղանթներով կամ նրբաթիթեղով:
Բնության գրկում պատրաստվող խորովածի համար պետք է օգտագործել պատրաստի փայտածուխ, սննդի համար՝ միանվագ օգտագործման ափսեներ և այլ պարագաներ:
Նախընտրելի է խորովածի համար օգտագործել անյուղ միս, այն պատրաստել անմիջապես օգտագործելուց առաջ: Պետք է հիշել, որ մանղալի վրա պատրաստված միսը միշտ չէ, որ անվտանգ օգտագործման համար: Միսը համարվում պատրաստ, եթե կտրելիս չի հոսում արյունային հեղուկ: Խորովածի մսի պատրաստման ժամանակ խորհուրդ է տրվում առատորեն օգտագործել համեմունքներ՝ կարմիր և սև պղպեղ, մանանեխ, քրքում, ուրց և այլն, քանի որ դրանք որոշ չափով օժտված են ախտահանող հատկություններով:
Եվ վերջում, անհրաժեշտ է պահպանել անձնական հիգիենայի կանոնները, սնունդ պատրաստելուց և ուտելուց առաջ ձեռքերը լվանալ օճառով: Ձեռքերը, սպասքը, միրգն ու բանջարեղենը լվանալ խմելու ջրով: –0–