ԵՐԵՎԱՆ, 28 հունվարի. /Նովոստի Արմենիա/. Երևանում հունվարի 26–ին հանդիպում է կայացել «Գտնված երազ» հայտնի մուլտֆիլմի ստեղծողներ Գագիկ և Հովհաննես Դիլաքյանների հետ:
Այսօր եղբայրներն ապրում են ԱՄՆ-ում, սակայն հայրենիքի հետ կապը չեն կորցնում:
Ինչպես լրագրողների հետ զրույցում հայտնեց Գագիկ Դիլաքյանը, մուլտֆիլմը նկարահանվել է 1976 թվականին:
«Այդ ժամանակ մուլտֆիլմի մասին արձագանքներն այդքան էլ լավը չէին, սակայն ժամանակի ընթացքում «Գտնված երազը» ապացուցեց, որ արժանի ստեղծագործություն է և մինչ օրս հետաքրքիր է: Այնուամենայնիվ, սկիզբն այդքան էլ խոստւմնալից չէր», - ասաց նա:
Ըստ Գագիկ Դիլաքյանի, նրանք եղբոր հետ երկար տարիներ բնակվում են Նյու Յորքում, իսկ վերջին 7 տարվա ընթացքում հաճախ այցելում են Հայաստանը:
«Մեր վերջին այցի նպատակն է վերջերս հրապարակված մեր երկու գրքերի շնորհանդեսը, որոնցից մեկը հիմնված է «Գտնված երազ» մուլտֆիլմի վրա, իսկ մյուսը՝ հայկական ասացվածքների», - նշեց Դալաքյանը:
Պատասխանելով այն հարցին, թե ի՞նչն է իրենց ամենից շատ տպավորել հայրենիք կատարած վերջին այցի ընթացքում` Գագիկ Դիլաքյանն ասաց, որ դա, անշուշտ, երիտասարդությունն է:
«Այստեղ մենք շատ ենք շփվում երիտասարդների հետ և կարող ենք ասել, որ Հայաստանում մեծանում է հիասքանչ սերունդ, դա մեզ հույս է ներշնչում հետագա լավ փոփոխությունների հարցում», - ասաց նա:
Հովհաննես Դիլաքյանն իր հերթին նշեց, որ այսօր «Գտված երազը» ավելի շատ ուշադրություն է գրավում, քան ստեղծման տարիներին:
«Երբ մենք մուլտֆիլմի փակ ցուցադրություն կազմակերպեցինք Հայաստանում, հանդիսատեսը շատ սառն ընդունեց այն, ինչը մեզ շատ հիասթափեցրեց: Մուլտֆիլմը չէր արտահայտում ժամանակի պահանջը: Մենք փոքր–ինչ հիասթափված էինք, սակայն զգում էինք, որ ինչ-որ լավ բանենք ստեղծել: Երբ ցուցադրեցինք մուլտֆիլմը Մոսկվայում, այն շատ ջերմ ընդունվեց: Այդ ժամանակ հասկացանք, որ կարողացել ենք իրագործել մտածածը», - նշեց Հովհաննես Դիլաքյանը:
Նրա խոսքով, մուլտֆիլմի պապիկին Մոսկվայում հնչունավորել է հայտնի դերասան Եվգենի Լեոնովը:
«Ցավոք, այդ ձայնագրությունը կորել է», - ավելացրեց Դիլաքյանը:
Նա նշեց, որ Հայաստան կատարած վերջին այցի ժամանակ իր ու եղբոր մոտ նոր ստեղծագործական գաղափար է ծագել, որը կապված է ասացվածքների հետ:
«Ցանկանում ենք ստեղծել ասացվածքների շարք այնպիսի հայկական անունների հիման վրա, ինչպիսիք են Վարդուհին, Վրեժը, Պայծառը և այլն», – նշեց Հովհաննես Դիլաքյանը։
Նոր մոլտֆիլմ ստեղծելու մասին խոսելիս նա հայտնեց, որ նրանց հաճախ են հարցնում՝ չի՞ եկել, արդյո՞ք, ժամանակը, որպեսզի մուլտֆիլմի պապիկը արթնանա:
«Մոսկվայում մեզ առաջարկել են «Գտնված երազի» հիման վրա մուլտսերիալ նկարահանել, սակայն մենք դեռ վստահ չենք՝ պետք է դա անել, թե ոչ», - ավելացրեց նա:-0-
