ԵՐԵՎԱՆ, 28 հուլիսի. /Նովոստի–Արմենիա/. 2017–2018 թթ.–ի ընդունելության քննությունների արդյունքները, որոնք հրապարակվեցին հուլիսի 19–ին, ցույց տվեցին, որ Հայաստանի գրեթե բոլոր բարձրագույն ուսումնական հաստատություններում մնացել են բազմաթիվ թափուր տեղեր` մոտ 60%։
Հասարակության շրջանում սկսել են մտորել այն մասին, թե ինչու է Հայաստանում կտրուկ կրճատվել դիմորդների թիվը և ինչն է հանգեցրել նման դիսբալանսի։ Սակայն փորձագետները ստեղծված իրավիճակում որևէ տարօրինակ բան չեն տեսնում։
ՀՀ ԿԳ նախկին նախարար, «Մխիթար Սեբաստացի» կրթահամալիրի տնօրեն Աշոտ Բլեյանի խոսքով, 2016 թ.–ի համեմատ` այս տարի չի նկատվում կտրուկ տարբերություն շրջանավարտների և դիմորդների քանակի միջև։
«2017 թ.–ին Հայաստանում, պաշտոնական տվյալներով, եղել է մոտ 20 հազար շրջանավարտ, որոնցից Հայաստանի բուհեր է ընդունվել 11 հազարը։ Կա եվրոպական չափորոշիչ, որի համաձայն` բարձրագույն կրթություն ստանում է բնակչության միայն 60 տոկոսը։ Հետևաբար, եթե 20 հազարից 11 հազարն ընդունվել է հայկական բուհեր և ևս հազարը` օտարերկրյա բուհեր, ապա ստացվում է, որ ստանդարտ 60 տոկոսն ապահովվել է», – հայտարարեց նա։
Загружается новость ... "Лево"
Բլեյանի խոսքով, բոլոր շրջանավարտները երբեք չեն ձգտել ստանալ բարձրագույն կրթություն։ Մի մասը նախընտրում է ստանալ միջին մասնագիտական կրթություն կամ դպրոցն ավարտելուց հետո անցնում է աշխատանքի, իսկ երիտասարդների մի մասն էլ գնում է բանակ` ծառայելու։
«Ես խնդիր չեմ տեսնում այն հարցում, որ Հայաստանում ոչ բոլոր շրջանավարտներն են ընդունվում բուհեր։ Այլ բան է, որ բուհերում թափուր տեղերն ավելի շատ են, քան դիմորդները։ Այդ խնդիրը միշտ կլինի, քանի որ Հայաստանում մշտապես հայտնվում են նոր բուհեր։ Եվ դրանք նման իրավիճակում ստիպված են ներգրավել օտարերկրյա ուսանողների», – ասաց նա։
Կրթության միջազգային ակադեմիայի Տնօրենների խորհրդի նախագահ Անահիտ Հարությունյանն իր հերթին ավելացրեց, որ Հայաստանում տարեցտարի կրճատվում է շրջանավարտների թիվը, և երկրի բուհերն արդեն սովորել են աշխատել նման պայմաններում։
«Նման իրավիճակ է առաջացել մի քանի պատճառով։ Առաջին հերթին, շրջանավարտների և դիմորդների թվի նվազման վրա ազդում է միգրացիայի մակարդակն ու Հայաստանի մշտական բնակչության կրճատումը։ Երկրորդը, Հայաստանում տարեցտարի բացվում են նոր բուհեր կամ բավականին հեղինակավոր կրթական հաստատությունների մասնաճյուղեր», – ասաց Հարությունյանը։
Նրա խոսքով, Հայաստանում գործող միջպետական բուհերում ավելի քիչ են թափուր տեղերը, քան պետականներում։
«Միաժամանակ, մեր հայ դիմորդներն այսօր ձգտում են ընդունվել հենց նման բուհեր, սակայն խնդիրը կրթության որակը չէ, նրանք պարզապես հասկանում են, որ կստանան այնպիսի դիպլոմ, որը կգործի մի քանի երկրներում», – ընդգծեց նա։
Հարությունյանը վստահություն հայտնեց, որ ստեղծված իրավիճակը չի ազդի բուհերում կրթության արժեքի և պրոֆեսորադասախոսական կազմի վրա։–0–