ԵՐԵՎԱՆ, 16 սեպտեմբերի. /Նովոստի–Արմենիա/. Բրիտանացի դիզայներ Ռայան Յասինը մշակել է առաձգական մանկական հագուստ, որը «մեծանում է» երեխայի հետ միասին։
Ուսման ժամանակ ավիաշինարարության ոլորտում ձեռք բերած հմտությունների կիրառմամբ` Լոնդոնի Արվեստների թագավորական քոլեջի 24–ամյա շրջանավարտը ստեղծել է կտորի հատուկ տեսակ, որը սեղմվում և ձգվում է երեխայի աճին զուգահեռ։
Ռայանի խոսքով, էլաստիկ կտորը նման է օրիգամիի։ Նա փոխում է չափը` միաժամանակ պահպանելով նախկին ձևը։ Այդ կտորից կարված հագուստը ջրակայուն է, այն պաշտպանում է նաև քամուց։ Այդ հագուստը կարելի է լվանալ լվացքի մեքենայում, այն ենթակա է վերամշակման, նշում է vesti.ru–ն` հղում անելով Futurism–ին։
Petit Pli հավաքածուում ներկայացված են մանկական շապիկներ, տաբատներ և կոմբինիզոններ, որոնք նախատեսված են 6–36 ամսական երեխաների համար։
Իր մշակման համար նորարարն արժանացել է Ջեյմս Դայսոնի հեղինակավոր մրցանակին, որը հանձնվում է ամեն տարի համալսարանների ուսանողներին և շրջանավարտներին արդյունաբերական դիզայնի և ինժեներական նախագծման համար։ Ռայանն արդեն մշակել է հագուստի ավելի քան 500 նախատիպ։ Մրցանակային գումարը դիզայները կծախսի բիզնեսի ընդլայնման նպատակով։ –0–