ԵՐԵՎԱՆ, 7 սեպտեմբերի. /Նովոստի–Արմենիա/. Մոսկվայի շրջանային ռազմական դատարանը 12 տարվա ազատազրկման է դատապարտել ձեռներեց Արամ Պետրոսյանին 2016 թ.–ին Մոսկվայի «Սիթիբանկի» մասնաճյուղում պատանդներ վերցնելու գործով։
«Դատապարտյալին մեղավոր ճանաչել ահաբեկչության և պատանդներ վերցնելու համար։ Պետրոսյանին դատապարտել 12 տարվա ազատազրկման խիստ ռեժիմի գաղութում», – նշվում է հինգշաբթի հրապարակված դատավճռում, հաղորդում է interfax–ը։
2016 թվականի օգոստոսի 24–ի երեկոյան ՌԴ իրավապահ մարմինները հաղորդում են ստացվել, որ Մոսկվայի բանկային բաժանմունքներից մեկում անհայտ տղամարդը պատանդներ է պահում։
Քննության վարկածով, Պետրոսյանը գնացել է Բոլշայա Նիկիտսկայա փողոցում գտնվող բանկ, որտեղ պահել է չորս մարդու և սպառնացել, որ կպայթեցնի կրծքին ամրացված պայթուցիկի տեսք ունեցող սարքը։
Մի քանի ժամ անց տղամարդը բաց է թողել բոլոր պատանդներին և դուրս եկել շենքից։ Ինչպես դրանից հետո հայտնում էր քննությունը, հարցաքննության ընթացքում Պետրոսյանն ասել է, որ ցանկանում էր իր խնդրի նկատմամբ գրավել հասարակայնության ուշադրությունը և չէր պատրաստվում մարդ սպանել։
55–ամյա Արամ Պետրոսյանի մոտ դեպքից մի քանի տարի առաջ բիզնեսի հետ կապված խնդիրներ են ծագել։
Պետրոսյանը, մասնավորապես, հայտնել է, որ վաճառում էր դեղատուփեր, սակայն վերջերս սնանկացել է, իսկ հանցագործությունն արել է անելանելիության զգացումից և հուսահատությունից: Նախագահին ուղղված ուղերձում, որը նա նկարահանել էր բանկը գրավելուց ոչ շատ առաջ, գործարարը պահանջել է ֆիզիկական և իրավաբանական անձանց սնանկացումը դաշնային մակարդակով ընդունել որպես հիվանդություն, ինչպես նաև ստեղծել նոր ինստիտուտ, որը կզբաղվի նմանատիպ խնդիրներով:–0–