ԵՐԵՎԱՆ, 19 հունիսի./Նովոստի-Արմենիա/. Ռուսաստանի Դաշնության Տուլայի շրջանում հունիսի 18-ին վթարված Երևան–Նիժնի Նովգորոդ միկրոավտոբուսը պատկանել է «Քոչար տուր» ընկերությանը:
Հունիսի 18–ին ժամը 14.13-ին ՌԴ Տուլայի շրջանում` Մ-4 դաշնային ավտոճանապարհի Մոսկվա-Երևան հատվածի 133-րդ կմ-ին, տեղի է ունեցել ՃՏՊ, բախվել են «ԿամԱԶ» մակնիշի բեռնատար ավտոմեքենան և երթուղային միկրոավտոբուսը,ինչի հետևանքով կա 1 զոհ և 9 տուժած:
Տուժածներից 6-ը տեղափոխվել են Ստուպինո, 3-ը Տուլա քաղաքի հիվանդանոց: Պարզվել է նաև, որ միկրոավտոբուսը ուղևորվում էր Երևանից Նիժնիյ Նովգորոդ: Հայտնի է նաև զոհի անունը, ով ՌԴ քաղաքացի 1961 թ. ծնված Նասիրով Օթարն է։
Ինչպես հաղորդում է Yerkir.am-ը, ընկերության տնօրեն Արամ Քոչարյանն ասել է, որ հեռախոսազրույց է ունեցել վարորդի` Կարապետ Մողրովյանի հետ:
«Կարապետը ոչ թե մեր վարորդներից է, այլ իմ ընկերն է: Նա ուղղակի խնդրել ու վերցրել էր մեքենան` ուղևորափոխադրում իրականացնելու համար: Կարապետին վաղուց եմ ճանաչում, լավ, աշխատասեր տղա է, ուղղակի հիմա մի քիչ ֆինանսական խնդիրներ ուներ, 4 երեխա է մեծացնում, որոշեց, որ պետք է ուղևորափոխադրում իրականացնի, փող աշխատի»,- ասել է Քոչարյանը:
Загружается новость ... "Лево"
Նա տեղեկացրել է նաև, որ թե՛ Կարապետը, թե՛ ուղևորները նույն բանն են ասում. «Ավտոբուսն իր գծով գնալիս է եղել, երբ հանկարծ «ԿամԱԶ»-ը դուրս է եկել ավտոբուսի դիմաց:
««ԿամԱԶ»-ը միանգամից մեքենան քաշել է ավտոբուսի դիմաց, և եթե Կարապետն իր գիծը փոխեր` ձախ քաշեր, ավելի շատ զոհեր կլինեին, որովհետև մայրուղու վրա են եղել, լիքը երթևեկություն: Կարապետն ամենաօպտիմալ ճանապարհով է տեղում խնդիրը լուծել` փորձել է ուղղակի կանգնեցնել մեքենան ու հարվածել է «ԿամԱԶ»-ին»,- ասել է Քոչարյանը:
Վթարից մահացած Նասիրով Օթարը, ով Ռուսաստանի քաղաքացի է, նստած է եղել առջևում: «
Օթարն էլ մեր ընկերն էր, նա էլ վարորդ էր: Մոտ տղա էր մեզ, դրա համար էլ առջևում էր նստել, որ Կարապետի հետ ասել-խոսելով գնան ճանապարհը»,- հայտնել է Քոչարյանը:-0-