ԵՐԵՎԱՆ, 24 հունվարի. /Նովոստի-Արմենիա/. Փրկարարները շան երեք ձագի են փրկել Իտալիայում գտնվող Rigopiano հյուրանոցի փլատակների տակից, որը նախորդ շաբաթ մնացել էր ձնակույտի տակ։
Ինչպես նշում են դեպքի վայրում աշխատող փրկարարները, այն փաստը, որ շներին ողջ են գտել, վկայում է փլատակների տակ օդի առկայության մասին, հաղորդում է bbc.com–ը։
«Մենք գիտեինք, որ այս շնիկներն այնտեղ (հյուրանոցում) են, սակայն հստակ չգիտեինք, թե որտեղ: Երբ իմացանք այդ մասին, զգուշացրեցինք հրշեջներին, ովքեր ներխուժեցին շենք: Մենք նրանց կաթսայատանն ենք հայտնաբերել», - լրագրողներին ասել է փրկարարական ծառայության աշխատակիցը:
Նրա խոսքով, արտաքինից շնիկների հետ ամեն ինչ նորմալ է, սակայն նրանց ամեն դեպքում կհետազոտեն։
Ներկայում հաստատվել է 7 մարդու մահ: 22 մարդ համարվում է անհետ կորած, սակայն փրկարարները հույս ունեն, որ փլատակների տակ դեռևս ողջ մարդ կա:
Հունվարի 18-ի երեկոյան Իտալիայի Աբրուցո նահանգի Գրան Սասո հանգստավայրում գտնվող Rigopiano հյուրանոցը հայտնվել էր ձնակույտի տակ:
Ուժեղ ձյան և արգելափակված ճանապարհների պառճառով փրկարարներին հաջողվել է հասնել հյուրանոց միայն հաջորդ օրը վաղ առավոտյան:-0-
