ԵՐԵՎԱՆ, 20 նոյեմբերի. /Նովոստի-Արմենիա/. ՀՀ Հանրային ծառայությունները կարգավորող հանձնաժողովը հանրային քննարկումներ է անցկացնում ջրի սակագնի բարձրացման վերաբերյալ:
Հայաստանի ջրի միասնական օպերատոր «Veolia Jur» ընկերությունը (ֆրանսիական «Veolia Generale des Eaux» դուստր ընկերությունը) ներկայացրել է հանձնաժողովին ջրի սակագնի բարձրացման հայտ:
Ըստ հայտի, ընկերությունն առաջարկում է բարձրացնել սակագինը ներկա 191,414 դրամից մինչև 205,125 դրամ (ներառյալ ԱԱՀ):
Սակագինը փոփոխվում է մանրածախ վաճառքի ծավալների փոփոխման, արժեզրկման, էլեկտրաէներգիայի սակագնի փոփոխման և այլ ցուցանիշներից ելնելով:
Ըստ Հայաստանում ջրամատակարարման ցանցերի կոնցեսիոն կառավարման ծրագրի, 2018 թ.-ին ընկերությունը պետք է աշխատեր 186 դրամ սակագնով, 2019 թ.-ին սակագինը պետք է բարձրանար մինչև 194,4 դրամ, 2020 թ.-ին` 202,8 դրամ մեկ խորանարդ մետր ջրի համար: Ընդ որում, 2023 թ.-ից, երբ սակագինը հասներ առավելագույն 212,4 դրամի, այն պետք էր աստիճանաբար նվազեր մինչև 129,6 դրամ 2031 թ.-ին:
ՀՀ Հանրային ծառայությունները կարգավորող հանձնաժողովն ուսումնասիրել է ընկերության հայտը, իրականացրել է սեփական դիտարկումը և առաջարկում է սահմանել այն 202,272 դրամի չափով, ինչը 2,853 դրամով քիչ է ընկերության կողմից առաջարկվող սակագնից:
«Veolia Jur» ընկերությունը 2017 թ.-ի օգոստոսի սկզբին արդեն դիմել էր Հանրային ծառայությունները կարգավորող հանձնաժողով` ջրի սակագնի բարձրացման համար: Այն ժամանակ ջրի սակագինը կազմում էր 180 դրամ (0,37 դոլար): Ընկերությունն առաջարկում էր բարձրացնել այն մինչև 194,3 դրամ (0,45 դրամ):-0-
