ԵՐԵՎԱՆ, 1 օգոստոսի. /Նովոստի-Արմենիա/. Հայաստանի կառավարությունը հինգշաբթի հերթական նիստում որոշում է կայացրել պետբյուջեից հատկացնել 12 հազար դոլար կամ 5,8 մլն դրամ Եգիպտոսից հայ զբոսաշրջիկներին վերադարձնելու համար:
Հիշեցնենք, որ հուլիսի վերջին հայ զբոսաշրջիկները չէին կարողանում վերադառնալ Հուրգադայից դեպի Երևան նախատեսված չվերթի չեղարկման հետևանքով։ Ավելի ուշ ՀՀ փոխվարչապետ Տիգրան Ավինյանը տեղեկացրեց, որ Հուրգադա–Երևան ավիաչվերթի չեղարկման պատճառով Հուրգադայում մնացած ՀՀ քաղաքացիները կարող են վերադառնալ Հայաստան կառավարության կողմից ֆինանսավորած չարտերային չվերթերով։
«Ուզում եմ հայտնել, որ վերջին չվերթն իրականացվել է Հայաստանի քաղաքացիական ավիացիայի կոմիտեի, «Տարոն-Ավիա» ավիաընկերության, «Զվարթնոց» միջազգային օդանավակայանի և ՀՀ կառավարության համատեղ ջանքերի շնորհիվ: Մենք շատ մեծ զեղչեր ենք ստացել և′ օդավակայանից, և′ ավիաընկերությունից: Կարելի է ասել, որ վճարում ենք ինքնաարժեքից ցածր», - ասաց ՀՀ փոխվարչապետ Տիգրան Ավինյանը:
Ըստ նրա, հնարավոր է դարձել լուծել բոլոր տեխնիկական հարցերը դեպի Հուրգադա իրականացվող թռիչքների հետ կապված:
Հիշեցնենք, որ Հուրգադա–Երևան չվերթի չեղարկման փաստի առթիվ հարուցվել է քրեական գործ ՀՀ ՔՕ 178 հոդված 3-րդ մասի 1–ին կետի հատկանիշներով` խարդախություն։
Եգիպտոսում Հայաստանի հյուպատոս Ռաֆայել Մովսիսյանի խոսքով, A&R հայկական տուրօպերատորը չի կատարել իր ֆինանսական պարտավորություններն ավիափոխադրողի նկատմամբ, ինչի կապակցությամբ Հուրգադա–Երևան չվերթը չեղյալ է հայտարարվել։–0–