ԵՐԵՎԱՆ, 29 հունվարի. /Նովոստի–Արմենիա/. Հայաստանում նկատվում է ՍՇՎ–ով հիվանդացության նվազում, հիվանդանոցներում դեռ բուժում է ստանում մոտ 700 հիվանդ, ուրբաթ լրագրողներին ասաց ՀՀ ԱՆ Հիվանդությունների վերահսկման և կանխարգելման ազգային կենտրոնի տնօրեն Արտավազդ Վանյանը։
Նրա խոսքով` ՍՇՎ–ով հիվանդանոցներ դիմելիության գագաթնակետը գրանցվելէ հունվարի 17–18–ին, երբ հիվանդանոցներում արձանագրվել է 1200 հիվանդ, ինչից հետո թվերը սկսել են նվազել։
«Այս պահին թվերի կրճատում է նկատվում ոչ միայն հիվանդանոցներում, այլ նաև «Շտապօգնության» ծառայությունում և պոլիկլինիկաներում, ընդ որում թվերը համաչափ կրճատվում են ողջ երկրում։ Նույնիսկ Արարատի և Սյունիքի մարզերում, որտեղ գրանցվել էին ամենաշատ թվով հիվանդները, նկատվում է անկման միտում», – ասաց Վանյանը։
Նա նաև նշեց, որ 50–60 տոկոսով գրանցվել է հղիների առողջական վիճակի լավացում, 15 տոկոսով լավացել է ստացիոնարում բուժվողների վիճակը, միաժամանակ դրական տեղաշարժեր են գրանցվել ծանր վիճակում գտնվող հիվանդների մոտ։
Ինչպես նշեց փորձագետը, նման արդյունքների է հաջողվել հասնել վիրուսի ժամանակին բացահայտելու, կանխարգելիչ միջոցառումների կազմակերպման, անհրաժեշտ դեղամիջոցների առկայության և դպրոցներում ու նախադպրոցական հաստատություններում արձակուրդների երկարացման շնորհիվ։
Նա նշեց, որ ռիսկային է իրավիճակը մանկապարտեզներում և դպրոցներում արձակուրդների ավարտի կապակցությամբ, սակայն, նրա խոսքով, այնտեղ ևս նախատեսված են վերահսկման լրացուցիչ միջոցառումներ։
Նրա խոսքով, ԱՀԿ–ի տվյալներով` H1N1 վիրուսը լրջորեն տարածվել է Եվրոպայում, ինչպես նաև Ռուսաստանում, Վրաստանում, Թուրքիայում և Իրանում։
«Հայաստանում հիվանդացության հիմնական ալիքն արդեն անցել է, սակայն հարկավոր է զգոն լինել տարածաշրջանում տիրող իրավիճակի, ինչպես նաև փետրվարի 1–ից կրթական հաստատությունների աշխատանքի վերսկսման կապակցությամբ», – ասաց Վանյանը։
Առողջապահության պետական գործակալության պետ Սարո Ծատուրյանն իր հերթին նշեց, որ հունվարի 1–ից մինչ օրս ՍՇՎ–ով և հիվանդությունից հետո առաջացած բարդություններով Հայաստանի հիվանդանոցներ է դիմել 3 հազար մարդ։
«Բոլոր հիվանդները ստացել են անվճար բժշկական սպասարկում, սակայն հունվարի 20–ից հետո հիվանդության տարածման անկման կապակցությամբ բոլոր դիմողները կբուժվեն` ավելի վաղ գործող կարգի համաձայն», – ասաց Ծատուրյանն` ընդգծելով, որ անվճար բժշկական սպասարկում կտրամադրվի երեխաներին և սոցիալապես անապահով բնակչությանը։
ԱՆ–ի վերջին տվյալներով` Հայաստանի հիվանդանոցներից հունվարի 26–ին ՍՇՎ–ից և թոքաբորբից ապաքինմամբ դուրս է գրվել 216 մարդ։ Նրանցից 131–ը դիմել են ՍՇՎ–ի ախտանիշներով, այդ թվում` մինչև 18 տարեկան 96 երեխա, իսկ 85–ը` թոքաբորբով (37 երեխա)։
Հայաստանում գրանցվել է 18 մահվան դեպք, որոնց պատճառը H1N1 վիրուսից առաջացած բարդություններն են։ –0–
Ծանոթացեք լուրերին առաջինն ու քննարկեք դրանք մեր Telegram-յան ալիքում