Disneyland և Universal–ի խորհրդատուները կօգնեն Հայաստանին Noyland կառուցել

ԵՐԵՎԱՆ, 2 նոյեմբերի. /Նովոստի Արմենիա/. Disneyland և Universal–ի խորհրդատուները կօգնեն Հայաստանին Noyland կառուցել Վանաձորում, հինգշաբթի` ամփոփելով պաշտոնավարման մեկ տարին ասաց ՀՀ վարչապետ Կարեն Կարապետյանը։

Վարչապետը նշեց, որ Վանաձորը ունի ներուժ, սակայն այն զարգացնելու համար մեծ գործ պետք է կատարվի։ Մասնավորապես, կառավարությունը հրավիրել է իտալացի փորձագետների խորհրդատվության համար, իրականացվում են զբոսաշրջության զարգացման ծրագրեր, իսկ արդյունաբերության և գյուղատնտեսության ոլորտներներում մեկնարկել է 100 մլն դոլար արժողությամբ ներդրումային ծրագիրը։

«Արդեն մեկ տարի մենք աշխատում ենք ծրագրերի վրա, օրինակ` «Հայկական գյուղի» և Noyland–ի կառուցումը, ինչի համար համագործակցություն ենք սկսել այս ոլորտի լավագույն չորս խորհրդատուների հետ, որոնք աշխատել են Universal–ի, Disneyland–ի վրա, որպեսզի նրանք տարածք նախանշեն և մշակեն Վանաձորի զարգացման հայեցակարգը», – ասաց Կարապետյանը։

Նրա խոսքով, նախատեսվում է ստեղծել լուրջ ծրագիր, որը հետաքրքիր զարգացում կունենա։ Կարապետյանը նշեց նաև, որ քննարկվում են ենթակառուցվածքային լուծումների հնարավորությունները։ –0–