ԵՐԵՎԱՆ, 4 հունիսի. /Նովոստի-Արմենիա/. Մինչև վերջերս, հետազոտողներին չէր հաջողվում ուսումնասիրել եգիպտական մումիաների գենը, քանի որ հնարավոր չէր բացահայտել և վերլուծել նման հինավուրց ԴՆԹ-ն: Առանց գենետիկայի մասին տեղեկատվության բոլոր գիտելիքները, որ այժմ մենք ունենք հին եգիպտացիների ու նրանց քաղաքակրթության մասին, թերի է:
Հին եգիպտացիների գենետիկական նյութի ուսումնասիրության հիմնական դժվարությունը կայանում էր նրանում, որ ԴՆԹ-ն գրեթե պահպանված չէ, բացի այդ, այն չափազանց աղտոտված է:
Գիտնականները հակված էին մտածել, որ դարերի ընթացքում մումիաների ԴՆԹ-ն լիովին ոչնչացվել է: Հետազոտությունը ղեկավարող Յոհաննես Կրաուսը (Johannes Krause) կարծում էր, որ ԴՆԹ-ի ոչնչացմանը կարող էր նպաստել խոնավության բարձր մակարդակը, տաք կլիման և քիմիական նյութերը, որ օգտագործվել են մումիականացման ընթացքում: Այս մասին գրում է
vesti.ru-ն:
Եգիպտական մումիաների գենը հաջողվել է վերծանել գիտնականների միջազգային թիմին, որը ղեկավարում էին Գերմանիայի հետազոտողները: Նրանք կարողացել են առանձնացնել և ուսումնասիրել տարբեր ժամանակաշրջանների՝ մ.թ.ա. 1400-ից մինչև մ.թ. 400 թվին պատկանող մումիաների ԴՆԹ-ն: Հետազոտողները ուսումնասիրել են 151 մումիա, որոնցից 3-ի գեները ամբողջությամբ վերծանվել են: Մումիաների մեծամասնության բջիջներում պահպանվել են միայն միտոքոնդրիկ ԴՆԹ-ն, բայց երեք դեպքերում հետազոտողներին հաջողվել է բացահայտել և ուսումնասիրել նաև միջուկային ԴՆԹ-ն:
Գիտնականները կարողացել են համեմատել հին եգիպտացիների և Եգիպտոսի ժամանակակից բնակիչների գեները: Նրանք պարզել են, որ մարդիկ, ովքեր բնակվում էին Հին Եգիպտոսում, ավելի շատ ընդհանրություններ ունեն հնում և ներկայում Մերձավոր Արևելքում բնակվողների հետ: Ժամանակակից եգիպտացիներն ավելի շատ գենետիկ ընդհանրություններ ունեն Սահարայի հարավի բնակիչների հետ:
Հետազոտողները ենթադրում են, որ Եգիպտոսի ժամանակակից բնակիչների գենում «կեղտն» առաջացել է այն ժամանակ, երբ ակտիվացել է եգիպտացիների և Սահարայի հարավի բնակիչների միջև առևտուրը, 1300 տարի առաջ սկսված ստրկավաճառության, ինչպես նաև նրանից հետո, երբ մարդիկ ավելի հաճախ սկսեցին նավարկել Նեղոսով: -0-