ԵՐԵՎԱՆ, 3 նոյեմբերի. /Նովոստի-Արմենիա/. Նոր հետազոտությունը ցույց է տվել, որ սոցիալական մեդիայի չափավոր կիրառումն ազդում է կյանքի տևողության վրա: Գիտնականների կարծիքով, կարևորը, որ վիրտուալ տարածությունն իրական կապերի և կենդանի շփման մաս լինի:
«Ամենայն հավանականությամբ, առցանց շփումը կարող է օգտակար լինել առողջությանը: Գլխավորը, որ բավականաչափ ժամանակ մնա իրական շփման համար», - ասում է Սան Դիեգոյի (ԱՄՆ) Կալիֆոռնիայի համալսարանի գիտնական Ուլյամ Հոբսը, գրում է
vokrugsveta.ru կայքը։
Հոբսը և նրա գործընկերները հետազոտության շրջանակում համակարգչային ծրագրի միջոցով վերլուծել են 1945-1989 թ.-ի միջակայքում ծնված և Facebook-ում գրանցված Կալիֆոռնիայի 12 մլն բնակիչների տվյալները: Այդ տվյալները համադրվել են Կալիֆորնիայում մահացության վերաբերյալ տվյալների հետ:
Հատուկ ալգորիթմի շնորհիվ հաստատվել է կես տարվա ընթացքում սոցիալական ցանցերից օգտվելու հաճախականությունը, ինչպես նաև` նահանգում մահացության մակարդակը: Պարզվել է, որ Facebook-ի օգտատերերն ավելի երկար են ապրում, քան նրանք, ովքեր չեն օգտվում սոցիալական ցանցերից: Այդ պարագայում մահացության հավանականությունը նվազում էր 12 տոկոսով: Որպես հավանական բացատրություն` մասնագետներն առաջարկում են Համացանցում և սոցիալական ցանցերում ժամանակ անցկացնող մարդկանց ավելի բարձր եկամուտը:
Հետազոտողները հայտնաբերել են նաև, որ սոցիալական ցանցերում ընկերների քանակն ազդում է մահվան ռիսկերի վրա: Որքան ավելի լայն է շփման միջավայրը, այնքան ավելի քիչ է եղել Facebook-ի օգտատերերի շրջանում մահացությունը: Նույնը վերաբերում է նաև այն մարդկանց, ովքեր ավելի հաճախ են լուսանկար հրապարակում: Գիտնականների կարծիքով, լուսանկարների առկայությունը էջում վկայում է այլ մարդկանց հետ ակտիվ շփման մասին: Հենց այդ փաստը կարող է ազդել սոցիալական ցանցի օգտատերերի շրջանում մահացության մակարդակի նվազման վրա: -0-