ԵՐԵՎԱՆ, 25 հուլիսի. /Նովոստի–Արմենիա/. Օգտատերերի ներգրավվածությունը սոցցանցերում միանգամայն փոխում է տեղեկատվական պատերազմների լանդշաֆտները, ասվում է «Նորավանք» գիտակրթական հիմնադրամի տեղեկատվական հետազոտությունների կենտրոնի ավագ փորձագետ Սամվել Մարտիրոսյանի զեկույցում։
Նրա կարծիքով, տեղեկատվական դիմակայության, քարոզչության և հակաքարոզչության ժամանակակից մեթոդները կախված են համացանցի, սոցցանցի, բջջային տեխնոլոգիաների զարգացման արդյունքում ստեղծված նոր միջավայրից։
«Սոցցանցերը կարծիքների հրապարակային փոխանակման նոր ձևաչափ են, որը հանգեցրել է աշխարհագրական սահմանների ջնջմանը, ազգային, տարիքային, սեռային տարբերությունների զրոյացմանը։ Սոցցանցերի էությունը յուրաքանչյուր օգտատիրոջ դարձնում է ինչպես պոտենցիալ սպառող, այնպես էլ տեղեկության գեներատոր»,– նշեց Մարտիրոսյանը։
Նրա խոսքով, միաժամանակ, մոլորակի բնակչությունն ավելի է ներգրավվում սոցցանցերում։ Ըստ ITU կազմակերպության տվյալների, 2015 թվականի դեկտեմբերի դրությամբ Երկրում եղել է շուրջ 3.26 մլրդ օգտատեր։ Մինդեռ 2000 թվականին այդ ցուցանիշը հասնում էր միայն 400 մլն–ի։ Փաստորեն, այսօրվա դրությամբ, մոլորակի բնակչության գրեթե կեսը ներգրավված է ցանցում, և այդ թիվը դինամիկ աճ է ցուցադրում։
Փորձագետը կարծում է, որ մոլորակի գործնականորեն յուրաքանչյուր երկրորդ օգտատերն անմիջականորեն հասանելի է դառնում հոգեբանական գործառնություններ վարելու համար։ Սոցցանցերի գործիքակազմը թույլ է տալիս թիրախային գրոհներ իրականացներ օգտատերերի կոնկրետ խմբերի վրա։
«Սոցիալական ցանցերը դառնում են տեղեկատվական պատերազմ վարելու նոր միջավայր։ Միաժամանակ, իրենք` օգտատերերը դառնում են ինչպես նշանակետ, այնպես էլ սոցիալական գործառնությունների չգիտակցված, բայց ներգրավված մասնակիցներ»,– ընդգծեց Մարտիրոսյանը։ -0-
Ծանոթացեք լուրերին առաջինն ու քննարկեք դրանք մեր Telegram-յան ալիքում
