ԵՐԵՎԱՆ, 20 ապրիլի. /Նովոստի–Արմենիա/. Լեհաստանի Վրոցլավ քաղաքում զարմանալի դեպք է գրանցվել։ Տեղի համալսարանական հիվանդանոցում լույս աշխարհ է եկել մի երեխա, ում մայրը մահացել էր նրա ծնունդից 55 օր առաջ, հայտնում է «Կոմսոմոլսկայա գազետան»` հղում անելով լեհական Nowa Trybuna Opolska թերթին, գրում է
rg.ru–ն։
Հաղորդվում է, որ մանկիկի 41–ամյա մայրը քաղցկեղով էր տառապում։ Հղիության 17–րդ շաբաթում բժիշկները հաստատել են հիվանդի գլխուղեղի մահը։ Քանի որ նրա սիրտը շարունակում էր աշխատել, բժիշկները որոշել են բժշկական սարքավորումների օգնությամբ պահել նրա օրգանիզմի կենսական ֆունկցիաները` երեխային փրկելու համար։ Մոտ երկու ամիս հետո նրանք հաջողությամբ կեսարյան հատում են իրականացրել` մանուկը ծնվել է հղիության 26–րդ շաբաթում։
Նորածինը մոտ մեկ կիլոգրամ էր կշռում, ուստի դժվարանում էր ինքնուրույն շնչել և շատ թույլ էր։ Նրան տեղափոցին ինտենսիվ թերապիայի բաժանմունք, և երկու ամիս անց հայրը նրան տուն տարավ։
«Wrozslavka» թերթի հաղորդմամբ, Վրոցլավի հիվանդանոցի մասնագետները մահացած հղի կնոջ կյանքը պահելու որևէ պրակտիկ փորձ չեն ունեցել, և բոլոր գիտելիքները ստիպված են եղել ստանալ գիտական գրականությունից հենց այդ միջոցառումներն իրականացնելու ընթացքում։ Անեսթեզիոլոգիայի և ինտենսիվ թերապիայի բաժանմունքի աշխատողներն ասում էին, որ իրենց ամենից շատ զարմացրել է երեխայի հայրը։ Այն ընթացքում, մինչ մասնագետները պահում էին մոր կենսական ֆունկցիաները, նա գալիս էր հիվանդասենյակ և հեքիաթներ կարդու իր որդուն։
Վրոցլավի դեպքին համանման դեպքերը բժշկական պրակտիկայում չափազանց հազվադեպ են պատահում։ Առաջին անգամ մահացած մոր երեխային հաջողվել է փրկել 1983 թվականին ԱՄՆ–ում` կնոջ կյանքն արհեստականորեն պահում էին 84 օր։ Վերջին անգամ մոր ուղեղի մահը հաստատելուց հետո երեխային փրկելու դեպք է գրանցվել 2013 թվականին Հունգարիայում։ Դեբրեցենի համալսարանի մասնագետներն օգնել են լույս աշխարհ գալ երեխայի մոր մահից երեք ամիս անց։ -0-
