Արթնանում է նեանդերտալացիներին կործանած գերհրաբուխը

ԵՐԵՎԱՆ, 24 դեկտեմբերի. /Նովոստի-Արմենիա/. Մարդկության պատմության մեջ ամենամեծ ժայթքումն առաջացրած իտալական գերհրաբուխը սկսել է արթնանալ.մագմայում գազերի ճնշումը մոտենում է կրիտիկական մակարդակի, գրում է nat-geo.ru-ն:

Նեապոլի հյուսիս-արևմուտքում են տեղակայված Ֆլեգրեյան դաշտերը կամ Կամպի-Ֆլեգրեյը-խիտ բնակեցված տարածք՝ 10 x 10 կմ մակերեսով, որին հատուկ է երկրի մակերևույթի՝ լավային մոտիկ տեղակայված լինելը:

Երկրաբանական տեսանկյունից վերջին 15 000 տարիների ընթացքում կալդերան անցել է ժայթքումների երեք ժամանակաշրջաններով, որոնք ընդհատվել են հանգստի հազարամյակներով:

Կամպի-Ֆլեգրեյի առավել խոշոր ժայթքումը, որը տեղի է ունեցել 200 000 տարի առաջ, դարձել է, այսպես կոչված, հրաբխային ձմռան պատճառ, որն էլ, ըստ գիտնականների, հանգեցրել է նեանդերտալացիների անհետացման: Իսկ վերջին անգամ գերհրաբուխն արթնացել է 500 տարի առաջ:

Ստեղծելով գերհրաբխի ակտիվության համակարգչային մոդելը՝ գիտնականները հայտնաբերել են մի շարք ժայթքումների օրինաչափություն: Սակայն հաջորդ գերժայթքման ճշգրիտ ամսաթիվը պարզել չի հաջողվել:

Այնուամենայնիվ, բազմաթիվ մասնագետներ հակված են կարծել, որ դա կարող է տեղի ունենալ առաջիկա 100−200 տարիներին: