ԵՐԵՎԱՆ, 17 մայիսի. /Նովոստի–Արմենիա/. 1C ծրագրերի մշակմամբ զբաղվող ռուսական ընկերությունն ավելի քան 250 հազար եվրո է ներդրել ռուսաստանաբնակ հայ ծրագրավորող Վահան Մարտիրոսյանի TryFit սթարթափի մեջ, հաղորդում է
Firrma պորտալը։
TryFit սթարթափը տեխնոլոգիաներ է մշակում կոշիկը վիրտուալ հարթակում փորձելու համար։ TryFit–ը, մասնավորապես, մշակում է 3D սքաներ և բջջային հավելված, որը կոչված է օգնել գնորդին 1–2 րոպեում գտնելու կատարյալ կոշիկ։
«Մենք հիմա աշխատում ենք ապրանքի հոսքագծի հետ ծրագրի ինտեգրման ուղղությամբ։ Եվ կոշիկ արտադրող բոլոր ընկերությունները, որոնք օգտագործում են 1С ծրագիրը, կկարողանան օգտվել մեր տեխնոլոգիայից», – նշել է Մարտիրոսյանը։
Ներդրումները կուղղվեն սքաներների, հետագա գիտահետազոտական աշխատանքների, վաճառքի և մարքեթինգի վրա։
Մարտիրոսյանը սկսել էր թիմ հավաքել 2015 թ.–ի վերջին։ Նրա գործընկերն է ձեռներեց Ֆյոդոր Սուզդալևը։ TryFit–ի համահիմնադիրներն են նաև Dressformer–ի նախկին համասեփականատեր ամերիկացի Մայքլ Ուոլդմենը և ռուս Սերգեյ Զավելսկին։
2016 թ.–ի հունվարին գործընկերները Դուբլինում գրանցեցին TryFit Technologies Ltd. ընկերությունը։ Սկզբնական շրջանում Մարտիրոսյանն ու Սուզդալևը TryFit–ում ներդրեցին շուրջ 50.000 դոլար։ Հետագայում հենց դա օգնեց նրանց գրավել պասիվ ներդրողների ուշադրությունը։
Սթարթափն ընդհանուր առմամբ արդեն ներգրավել է ավելի քան 500 000 դոլար, որոնց թվում են նաև Pulsar VC վենչուրային հիմնադրամի և ռուս խոշոր ձեռներեցի միջոցները, ում անունը դեռ չի հրապարակվում։
Հիմա TryFit–ը տեխնոլոգիան փորձարկում է Adidas–ի և «Էկոնիկա» ընկերության հետ։ –0–