ՌԴ ՊՆ–ն և Թուրքիայի ԶՈՒ–ն խզել են փոխգործակցության բոլոր ուղիները

ԵՐԵՎԱՆ, 26 նոյեմբերի. /Նովոստի–Արմենիա/. ՌԴ պաշտպանության նախարարությունը և Թուրքիայի Զինված ուժերը խզել են փոխգործակցության բոլոր ուղիները, հետ է կանչվել նաև Թուրքիայում գտնվող Ռուսաստանի ՌԾՆ ներկայացուցիչ Սևծովյան նավատորմի և թուրքական ՌԾՈՒ հետագա գործողությունների համակարգման նպատակով։ Այդ մասին, ինչպես փոխանցում է ՌԻԱ Նովոստին, լրագրողներին է հայտնել Ռուսաստանի պաշտպանության նախարարության պաշտոնական ներկայացուցիչ գեներալ–մայոր Իգոր Կոնաշենկովը։

«Այսօր ավելի վաղ ընդունած որոշմանը համապատասխան` խզվել են Ռուսաստանի պաշտպանության նախարարության և Թուրքիայի զինված ուժերի միջև փոխազդեցության բոլոր ուղիները»,– ասել է նա։


Պուտին. Թուրքիան գիտակցաբար փակուղի է տանում ՌԴ–ի հետ հարաբերությունները>>


«Դա վերաբերում է ոչ միայն, այսպես կոչված, «թեժ գծին», որը բացվել էր Սիրիայում ահաբեկչական ենթակառուցվածքի օբյեկտների ոչնչացման ընթացքում օդում հնարավոր միջադեպերը կանխելու համար»,– ավելացրել է Կոնաշենկովը։

Ռուսաստանի և Թուրքիայի հարաբերությունները ճգնաժամ են ապրում նրանից հետո, երբ երեքշաբթի Սիրիայում կործանվեց ռուսական Սու-24 ռմբակոծիչը։ Այն խոցվել է թուրքական F-16 «օդ–օդ» տեսակի հրթիռով սիրիական տարածքում և ընկել է Թուրքիայի հետ սահմանից 4 կիլոմետր հեռավորության վրա։ ՌԴ նախագահ Վլադիմիր Պուտինը հանձնարարել է կառավարությանը տնտեսական և մարդասիրական ոլորտներում համալիր միջոցառումներ մշակել Թուրքիայի ագրեսիային ի պատասխան։ -0-