ԵՐԵՎԱՆ, 10 նոյեմբերի. /Նովոստի-Արմենիա/. ՌԴ Դաշնային խորհրդի անդամ Նիկոլայ Ռիժկովը, ով Երևանում է գտնվում հայ-ռուսական համագործակցության միջխորհրդարանական հանձնաժողովի նիստին մասնակցելու նպատակով, մեկնաբանել է Ռուսաստանի կողմից Ադրբեջանին զենք վաճառելը:
«Այս, իսկապես զենք ենք վաճառում: Դա չի նշանակում, որ մենք վաճառում են հատուկ, որպեսզի մարտեր լինեն», - ասաց նա` պատասխանելով լրագրողների հարցին, թե ինչու է Հայաստանի ռազմավարական գործընկեր Ռուսաստանը Ադրբեջանին զենք վաճառում:
Ղարաբաղյան հակամարտության սրման օրերին ՌԴ փոխվարչապետ Դմիտրի Ռոգոզինը հայտարարել էր, որ Ռուսաստանը պայմանավորվածության համաձայն կշարունակի Ադրբեջանին զենք մատակարարել` որպես ռազմավարական գործընկերոջ: Այս հայտարարությունը վրդովմունքի ալիք էր առաջացրել հայ հասարակության և փորձագետների շրջանում:
«Պետք է ավելի արագ լուծել ղարաբաղյան հարցը, այդ ժամանակ ամեն ինչ իր տեղը կընկնի», - հայտարարեց Ռիժկովը:
Ղարաբաղյան հակամարտությունը սկիզբ է առել 1988 թ.-ին, երբ հիմնականում հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին։ 1991 թ. դեկտեմբերի 10-ին, Խորհրդային Միության փլուզումից մի քանի օր առաջ, Լեռնային Ղարաբաղում տեղի ունեցավ հանրաքվե, որի ժամանակ բնակչության ճնշող մեծամասնությունը՝ 99,89 տոկոսը Ադրբեջանից ամբողջովին անկախանալու կողմ քվեարկեց։
Դրանից հետո սկսվեցին լայնամասշտաբ ռազմական գործողություններ, որոնց հետևանքով Ադրբեջանը կորցրեց վերահսկողությունը Լեռնային Ղարաբաղի և նրան հարակից յոթ շրջանների նկատմամբ։
1994 թ.-ի մայիսի 12-ին՝ զինադադարի մասին համաձայնագրի ուժի մեջ մտնելուց հետո հակամարտության գոտում դադարեցին ռազմական գործողությունները։ Պատերազմի հետևանքով երկու կողմից զոհվեց մոտավորապես 25-30 հազ մարդ և մոտ մեկ միլիոնը ստիպված եղավ լքել բնակավայրերը։
Զինադադարի ռեժիմի մասին համաձայնությունը պահպանվում է մինչ այժմ։ 1992 թ.-ից մինչ օրս ընթանում են բանակցություններ հակամարտության խաղաղ կարգավորման ուղղությամբ ԵԱՀԿ Մինսկի խմբի շրջանակում։–0–
Ծանոթացեք լուրերին առաջինն ու քննարկեք դրանք մեր Telegram-յան ալիքում
