ԵՐԵՎԱՆ, 25 ապրիլի./Նովոստի–Արմենիա/. Մարդու իրավունքների եվրոպական դատարանը մերժել է առաջին նախագահ Լևոն Տեր–Պետրոսյանի հայցը Հայաստանի դեմ 2008 թվականին տեղաշարժման ազատության իրավունքի սահմանափակման վերաբերյալ։
Տեր–Պետրոսյանը բողոք է ուղղել ՄԻԵԴ այն մասին, որ 2008 թվականին իրավապահ մարմիններն իր կողմնակիցների հանրահավաքի ուժային ցրման ընթացքում ապօրինաբար պահել են իրեն Երևանի Ազատության հրապարակում և տարել են տուն, որտեղ փաստացի պահել են տնային կալանքի տակ։
Դատարանի որոշման մեջ նշվում է, որ Մարդու իրավունքների եվրոպական կոնվենցիայի 5–րդ հոդվածի 1 կետով (Ազատության և անձնական անձեռնմխելիության իրավունք) և 4–րդ արձանագրության 1–ին հոդվածով բողոքներն անհիմն են։
Загружается новость ... "Лево"
«Դատարանը չի տիրապետել այդ փաստերը հաստատող համոզիչ և ոչ երկիմաստ ապացույցների»,– նշվում է որոշման մեջ, որում, ի թիվս այլոց, նշվում է, որ որոշում կայացնելիս դիտարկվել են իրադարձությունների և «տնային կալանքի մասին» զեկույցներ, այդ թվում` Եվրոպայի խորհրդի գլխավոր քարտուղարի, Եվրոպայի խորհրդի խորհրդարանական վեհաժողովի մոնիթորինգային խմբի և Human Rights Watch կազմակերպության հաղորդումները։
Նշվում է նաև, որ մյուս կողմի ցուցմունքների համաձայն, նախկին նախագահն ինքն է համաձայնել նստել մեքենա և իր կամքով չի լքել տունը, քանի որ անվտանգության ծառայությունը չէր կարող նրան ուղեկցել։
Դատարանը միաժամանակ ընդունել է, որ Հայաստանի իշխանությունները 2008 թվականին խախտել են քաղաքացիների` հավաքներ անցկացնելու ազատությունը, իսկ ոստիկանությունը չարդարացված ուժ է կիրառել ցուցարարներին ցրելու համար։ -0-