ԵՐԵՎԱՆ, 22 փետրվարի. /Նովոստի–Արմենիա/. Հայաստանը խորապես շահագրգռված է Լիբանանի հետ հարաբերությունները խորացնելու բոլոր ոլորտներում, ասել է Հայաստանի նախագահ Սերժ Սարգսյանը Լիբանանի նախագահ Միշել Աունի հետ հանդիպմանը, հայտնում է հայկական պետության նախագահի մամուլի ծառայությունը։
«Մեզ համար մեծ ուրախություն և պատիվ է հյուրընկալել բարեկամ Լիբանանի նախագահին Հայաստանում, և մենք խորապես շահագրգռված ենք Լիբանանի հետ մեր հարաբերությունները խորացնելու բոլոր ոլորտներում»,– ասել է Սարգսյանը։
Նա նշել է, որ Լիբանանի առաջնորդի այցը նոր էջ է բացելու երկու երկրների հարաբերություններում, և, թեև դրանք ընդամենը 25 տարվա պատմություն ունեն, երկու ժողովուրդների բարեկամությունը դարեր է հաշվվում:
«Մենք խորապես շնորհակալ ենք Լիբանանի ժողովրդին և իշխանություններին մեր հայրենակիցների նկատմամբ ցուցաբերված հոգատար վերաբերմունքի համար: Նրանք ժամանակի ընթացքում դարձան Լիբանանի լիարժեք քաղաքացիներ՝ պահելով իրենց ազգային ինքնությունը: Եվ, իհարկե, մենք շնորհակալ ենք Լիբանանի իշխանություններին, այդ թվում՝ խորհրդարանին, Հայոց ցեղասպանության փաստը ճանաչելու համար: Սա շատ կարևոր ներդրում է»,– ասել է նախագահը։
Լիբանանի նախագահը շնորհակալություն է հայտնել հրավերի համար և մեծ պատիվ համարել Հայաստան այցելելը։
Загружается новость ... "Лево"
«Լիբանանի հայ համայնքի ներկայացուցիչներ կան իմ պատվիրակության կազմում` զբոսաշրջության նախարարը, նաև Դաշնակցություն կուսակցության ղեկավարը՝ պատգամավոր պարոն Բագրատունյանը: Պետք է ասեմ, որ հայ համայնքը մեծ ներդրում է ունեցել Լիբանանի զարգացման, ծաղկման գործում: Նրանք բավականին լուրջ են աշխատում իրենց գործունեության բոլոր բնագավառներում, պատասխանատու օղակներում»,– ասել է Աունը։
Նրա խոսքով, իր այցը միտված է ավելի ամրապնդելու Հայաստանի և Լիբանանի միջև հարաբերությունները:
«Հույս ունենք, որ Հայաստանի և Լիբանանի միջև այդ հարաբերությունները շատ ավելի կընդլայնվեն և կխորանան: Բազմաթիվ բնագավառներ կան, որոնց ուղղությամբ կարող ենք աշխատել, և դա կլինի ի բարօրություն մեր երկու երկրների»,- եզրափակել է նախագահ Միշել Աունը: -0-