Հայ դիվանագետը բացատրել է, թե ինչու է Երևանը ՄԱԿ–ում Ղրիմի ուկրաինական բանաձևի դեմ քվեարկել

ԵՐԵՎԱՆ, 17 նոյեմբերի. /Նովոստի–Արմենիա/. Հայաստանի` ՄԱԿ–ին առընթեր մշտական ներկայացուցչի տեղակալ Տիգրան Սամվելյանը բացատրել է, թե ինչու է Երևանը քվեարկել Ղրիմի ուկրաինական բանաձևի դեմ։

ՄԱԿ–ի սոցիալական և հումանիտար հարցերի կոմիտեն (երրորդ կոմիտեն) նոյեմբերի 15–ին Ղրիմում մարդու իրավունքների խախտումների վերաբերյալ բանաձև է ընդունել։ Փաստաթղթին կողմ են հանդես եկել 73 պետություն, այդ թվում` ԱՄՆ–ն և Եվրոպայի երկրների մեծամասնությունը, 76 երկիր ձեռնպահ մնաց, 23–ը դեմ քվեարկեցին։ Հայաստանը, Ռուսաստանի, Բելառուսի, Չինաստանի, Սերբիայի, Կուբայի, Հնդկաստանի, Ղազախստանի հետ միասին, դեմ է քվեարկել։

Դիվանագետի` Facebook–ում Հայաստանի ԱԳՆ էջում տեղադրած հայտարարությունում ասվում է, որ Երևանը միշտ կողմ է ժողովրդավարությանը, մարդու հիմնարար ազատություններին և իրավունքներին, այդ թվում` ժողովուրդների իրավահավասարությանը և ազգերի ինքնորոշման իրավունքին։

«Մեր կարծիքով, մարդու իրավունքների հետ կապված իրավիճակները պետք է քննարկվեն և դիտարկվեն այդ ոլորտի միջազգային օրենսդրության մաս համարվող սկզբունքների և նորմերի հիման վրա»,– նշեց նա։

Դիվանագետն ընդգծեց, որ մարդու իրավունքների պաշտպանության համատեքստում ներկայացված բանաձևը տարածքային ամբողջականության սկզբունքների հղումներ է պարունակում, որոնք ընտրողաբար կիրառվել են միջազգային այլ սկզբունքների հաշվին, այդ թվում` ժողովուրդների ինքնորոշման հաշվին, և դուրս են գալիս փաստաթղթի հնչեցրած նպատակների շրջանակից։

«Առաջնորդվելով հետևողական դիրքորոշմամբ` Հայաստանը չի կարող սատարել այն մոտեցումներին, որոնք հիերարխիա են սահմանում միջազգային իրավունքի սկզբունքների միջև»,– ասվում է հայտարարությունում։ Սամվելյանը հիշեցրեց, որ հայկական կողմը համապատասխան բանաձևին դեմ է քվեարկել նաև 2014 թվականին, և այդ պահից մոտեցումները չեն փոխվել։ -0-