Գագիկ Ծառուկյանը նշել է, թե որ դեպքում կսատարի Քոչարյանին

ԵՐԵՎԱՆ, 10 սեպտեմբերի. /Նովոստի–Արմենիա/. «Բարգավաճ Հայաստան» կուսակցության և «Ծառուկյան» խմբակցության ղեկավար, գործարար Գագիկ Ծառուկյանը երկուշաբթի պատասխանել է լրագրողների հարցին, թե արդյոք կսատարի Հայաստանի երկրորդ նախագահ Ռոբերտ Քոչարյանին։

«Ավելի վաղ ես ասել եմ, որ այդ հարցը մեր օրակարգում չկա, քանի որ մեզ ոչ ոք չի դիմել։ Այժմ պատասխանեմ ավելի հստակ։ Կարևոր է ոչ թե իմ, այլ ժողովրդի օժանդակությունը։ Եթե ժողովուրդն ընդունի նրան, ապա մենք էլ կընդունենք։ Եթե ժողովուրդը չընդունի, ապա ես իմ ժողովրդի թշնամին չէ»,– ասաց Ծառուկյանը։

Նա հիշեցրեց, որ միշտ եղել է ժողովրդի կողմը։


Երևանի ընդհանուր իրավասության դատարանը հուլիսի 28–ին որոշում է կայացրել 2 ամսով կալանավորել Հայաստանի երկրորդ նախագահ Ռոբերտ Քոչարյանին մարտի 1–ի գործի շրջանակում։ Նա մեղադրվում է մի խումբ անձանց հետ նախնական պայմանավորվածությամբ սահմանադրական կարգը տապալելու համար։ Որպես մեղադրյալ ներգրավվել է նաև ՀԱՊԿ գլխավոր քարտուղար Յուրի Խաչատուրովը, ով 5 մլն դրամ գրավի դիմաց ազատ է արձակվել, և Հայաստանի պաշտպանության նախկին նախարար Միքայել Հարությունյանը, ում նկատմամբ հայտարարվել է միջպետական հետախուզում։

Հայկական ընդդիմությունը` առաջին նախագահ Լևոն Տեր–Պետրոսյանի գլխավորությամբ, ով առաջադրվել էր 2008 թ.–ի փետրվարի 19–ին կայացած նախագահական ընտրություններին և պարտվել էր, փետրվարի 20–ից Երևանի կենտրոնում անցկացնում էր հանրահավաքներ` դժգոհություն հայտնելով քվեարկության արդյունքներից։ Բողոքի ակցիաները 2008 թ.–ի մարտի 1–2–ը վերածվեցին անկարգությունների և իրավապահ ուժերի ու ցուցարարների միջև բախումների, ինչի հետևանքով զոհվեց 10 մարդ, ավելի քան 200–ը վիրավորվեց։ -0-