ՀՀ ԱԳՆ փոխնախարարը և ՀԱՊԿ գլխավոր քարտուղարը Կազմակերպության դեկտեմբերյան նստաշրջանին վերաբերող հարցեր քննարկեցին

Դեկտեմբերի 20-ին Մոսկվայում կայանալիք ՀԱՊԿ Հավաքական անվտանգության խորհրդի նստաշրջանի նախապատրաստական աշխատանքների հետ կապված հարցեր քննարկվեցին ուրբաթ Երևանում ՀՀ արտգործնախարարի տեղակալ Շավարշ Քոչարյանի և ՀԱՊԿ գլխավոր քարտուղար Նիկոլայ Բորդյուժայի հանդիպմանը, հայտնում է հայկական ԱԳՆ-ի մամուլի ծառայությունը:

Մամուլի հաղորդագրության համաձայն, նախարարի տեղակալ Շավարշ Քոչարյանը տեղեկացրեց ստորագրվելիք փաստաթղթերի` Հայաստանում ներպետական համաձայնեցման ընթացքի մասին:

ՀԱՊԿ գլխավոր քարտուղարն իր հերթին ընդգծեց հայկական կողմի ակտիվ մասնակցությունը Կազմակերպության գործունեությանը, գոհունակություն հայտնեց կառուցողական մոտեցումների կապակցությամբ:

ՀԱՊԿ գլխավոր քարտուղար Նիկոլայ Բորդյուժան և ՀՀ ԱԱԽ քարտուղար Արթուր Բաղդասարյանը ՀԱՊԿ շրջանակներում տեղի ունեցած հանդիպումների և բանակցությունների ընթացքում Հայաստանի կողմից ձեռք բերված պայմանավորվածությունների կատարման ծրագիր են ստորագրել ուրբաթ Երևանում:
ՀԱՊԿ-ն ստեղծվել է ԱՊՀ անդամ-երկրների կողմից 1992 թ.-ի մայիսի 15-ին ստորագրված Հավաքական անվտանգության պայմանագրի հիման վրա: ՀԱՊԿ-ի կազմում ներառված են Հայաստանը, Բելառուսը, Ղազախստանը, Ղրղըզստանը, Ռուսաստանը, Տաջիկստանն ու Ուզբեկստանը:-0-