486.78
-0.64
574.01
+0.22
8.17
+0.03
+6
Եղանակը Երևանում
Հայ
Հայաստանում ավարտվեց նախագահական ընտրությունների քվեարկությունը. ԸՆԴՀԱՆՐԱՑՈՒՄ
03:10
20 Փետրվարի 2008

Ընտրությունների օրը՝ փետրվարի 19-ին, Հայաստանում ձևավորված բոլոր 1923 ընտրատեղամասերը ժամը 8։00-ից սկսել են ընդունել ընտրողներին։ Հասարակ քաղաքացիների հետ միասին իրենց քաղաքացիական պարտքը կատարելու է եկել նաև երկրի բարձրագույն ղեկավարությունը և նախագահի բոլոր ինը թեկնածուները։ ՀՀ նախագահ Ռոբերտ Քոչարյանն ընտրատեղամասում քվեարկելուց հետո լրագրողներին հայտնել է, որ իր ձայնը տվել է հանուն երկրի կայունության և բարգավաճման։ Այս մասին երեքշաբթի լրագրողներին հայտարարեց Ռոբերտ Քոչարյանը՝ իր ընտրատեղամասում քվեարկելուց հետո։Ինչպես նշեց երկրի ղեկավարը, նախագահական ընտրությունները փորձություն կդառնան Հայաստանի համար, որը «մենք պետք է անցնենք՝ դառնալով ավելի ուժեղ։ Համոզված եմ, որ այս ընտրություններն այդպիսի կլինեն»։

Ժողովրդավարության ամրապնդման տեսակետից, նախագահի խոսքերով, Հայաստանը կարձանագրի հերթական առաջընթացը։

Միաժամանակ Քոչարյանը հանձն չի առել կանխատեսել, թե արդյոք կլինի երկրորդ փուլ թե ոչ՝ հույս հայտնելով, որ ամեն ինչ կավարտվի արդեն առաջին փուլում։

Քվեարկությունից հետո ընտրական գործընթացի վերաբերյալ իր դիրքորոշումը հայտնել է վարչապետ, նախագահի թեկնածու Սերժ Սարգսյանը, որի կարծիքով Հայաստանում հեղափոխական տրամադրություններ չկան։ Նա ընդգծել է, որ հետընտրական պայքարը Հայաստանում «լինելու է պայքար` մեր ծրագրերի իրականացման համար»։

Սարգսյանը միաժամանակ ավելացրել է, որ իր հաղթանակի դեպքում կառավարության կազմում զգալի փոփոխություններ չեն լինի։

«Կառավարությունը ձևավորվել է ինը ամիս առաջ, և այս ժամանակահատվածի ընթացքում մենք լավ արդյունքների ենք հասել, այդ պատճառով դժվար թե անհրաժեշտ լինեն փոփոխություններ նրա կազմում», - ասել է Սարգսյանը։

Միաժամանակ նա նորմալ է գնահատել ընտրությունների ընթացքը և ընդգծել է դրանց կարևորությունը՝ քվեարկության արդյունքների վերաբերյալ վստահության ձևավորման տեսանկյունից։

ՀՀ նախագահի թեկնածու, պետության նախկին նախագահ Լևոն Տեր-Պետրոսյանը հայտարարել է, որ քվեարկել է ազատության համար և համոզմունք է հայտնել արդեն առաջին փուլում իր հաղթանակի մասին։

ՀՅԴ-ից նախագահի թեկնածու Վահան Հովհաննեսյանը տրամադրված է հաղթանակի և համոզված է, որ «նախագահական ընտրությունները կանցնեն հանգիստ և արդար»։ Նա ցանկանում է, որպեսզի հայ ժողովուրդն ընտրություններից հետո կարողանա համոզված ասել, որ նախագահական ընտրություններն անցել են արդար։

Հայաստանի նախագահի թեկնածու, «Օրինաց Երկիր» ընդդիմադիր կուսակցության առաջնորդ Արթուր Բաղդասարյանը ևս հավատում է իր հաղթանակին, որը «նոր հնարավորություն կտա՝ Հայաստանի զարգացման համար»։

Նա քվեարկել է նոր Հայաստանի օգտին, «որը վերջ կդնի աղքատությանը և ամենաթողությանը»։

Միաժամանակ թեկնածուն չի բացառել ընտրակեղծիքների հնարավորությունը և ընդգծել է, որ ձեռնարկվում են միջոցներ՝ դրանց դեմ պայքարելու համար։

«Ես հուսով եմ, որ հանրապետության նախագահի ընտրությունները կանցնեն բաց, ազատ և թափանցիկ մթնոլորտում, և ժողովուրդը կկարողանա ընտրել իր երկրի նախագահին», - ասել է նա։

«Ազգային միաբանություն» կուսակցության նախագահ, ՀՀ նախագահի թեկնածու Արտաշես Գեղամյանը քվեարկել է հայ ժողովրդի ազգային միաբանության օգտին։

«Ես եկել եմ ընտրությունների լավագույն սպասումներով, որ մենք կարող ենք չեզոքացնել հայկական պետականության առջև կանգնած սպառնալիքները և արել եմ իմ ընտրությունը՝ հանուն ազգային միաբանության», - ասել է Գեղամյանը։

Հայաստանի նախագահի թեկնածու, Ժողովրդական կուսակցության առաջնորդ Տիգրան Կարապետյանը քվեարկել է ազատ և արդար Հայաստանի օգտին։

Միաժամանակ ՀՀ նախագահի թեկնածու, «Ազգային համաձայնություն» կուսակցության առաջնորդ Արամ Հարությունյանը կարևորել է ընտրությունները «ընտրողների հոգեբանության փոփոխության տեսակետից, որը ժառանգություն է հասել խորհրդային պետությունից»։

Հայաստանի նախագահի թեկնածու, Ղարաբաղի նախկին արտգործանախարար Արման Մելիքյանը կարծում է, որ Հայաստանի այժմյան նախագահական ընտրությունները որոշիչ նշանակություն կունենան և «պետք է բեկումնային դառնան ընտրական պրակտիկայում»։

Միաժամանակ նա հույս է հայտնել, որ ընտրությունները կանցնեն թափանցիկ և օրինական։

Ինչպես նշել է ԱՊՀ դիտորդական առաքելության ԱՊՀ Միջխորհրդարանական վեհաժողովի դիտորդական առաքելության անդամ, Ռուսաստանի Դաշնության Խորհրդի անդամ Վլադիմիր Ռուշայլոն, ԱՊՀ դիտորդական առաքելությունը  հաստատում է Հայաստանում ընթացող նախագահական ընտրությունների նորմալ ընթացքը։

«Ամեն ինչ լավ է ընթանում, ընտրությունները նորմալ և կազմակերպված են ընթանում»,- ասել է Ռուշայլոն։

Միաժամանակ ԵԱՀԿ ԽՎ դիտորդները ձեռնպահ են մնացել ընտրական գործընթացի նախնական գնահատականից։

Մասնավորապես, ԵԱՀԿ ԽՎ դիտորդներդական առաքելության ղեկավար, ԵԱՀԿ ԽՎ փոխնախագահ, Բելգիայի սենատոր Աննա-Մարի Լիզինը հայտարարել է, որ ԵԱՀԿ ԽՎ դիտորդական առաքելությունը նախագահական ընտրությունների վերաբերյալ իր գնահատականը կհրապարակի չորեքշաբթի, երբ դիտորդները կհամակարգեն ստացված տվյալները։Ընտրություններին հետևում է 39 տեղական և 6 միջազգային կազմակերպությունների շուրջ 14 հազ. դիտորդ։

Ողջ ընտրական գործընթացում ընդդիմադիր կուսակցությունները հանդես են եկել հայտարարություններով՝ ընտրական գործընթացի խախտումների մասին։ Այսպես, Լևոն Տեր-Պետրոսյանի և Արթուր Բաղդասարյանի նախընտրական շտաբների համաձայն, գրանցվել են վստահված անձանց նկատմամբ բռնության, քվեաթերթիկների լցոնման, բաց քվեարկության, դիտորդների նկատմամբ ճնշումների դեպքեր։

Հայաստանի Հանրապետական կուսակցությունից  նախագահի թեկնածու, գործող վարչապետ Սերժ Սարգսյանի նախընտրական շտաբն իր հերթին հերքել է պետության նոր ղեկավարի ընտրությունների ընթացքում զանգվածային խախտումների վերաբերյալ լուրերը։

«Զարմանալի չէ, որ Լևոն Տեր Պետրոսյանի կողմնակիցները պետք է ամեն ինչ գցեն մեր շտաբի վրա, քանի որ մինչև ընտրությունները նրանց մարտավարությունը պարզ էր՝ ընտրություններն անվավեր համարել, եթե հաղթի իշխանության թեկնածուն»,- հայտնել է Սերժ Սարգսյանի նախընտրական շտաբի մամուլի քարտուղար Էդուարդ Շարմազանովը։

Նա պաշտոնապես հայտարարեց, որ որևէ լուրջ խախտում կամ միջադեպ, որը կարող էր  ազդել ընտրությունների ընթացքի վրա, տեղի չի ունեցել։ Նա ընդդիմադիր շտաբների բոլոր հայտարարությունները անվանեց սադրանք՝ ընդդիմադիր ճամբարի թեկնածուի կողմից։

Հայաստանի գլխավոր դատախազությունն արդեն հինգ քրեական գործ է հարուցել խախտումների փաստերով, որոնք վերաբերում են ընտրական գործընթացում վստահված անձանց գործունեությանը։

ՀՀ Ոստիկանության մամլո քարտուղար, փոխգնդապետ Սայաթ Շիրինյանն իր հերթին հայտարարել է, որ Ոստիկանությունը պատրաստ է քննարկել համապատասխան հայտարարությունները՝ ընտրախախտումների բոլոր փաստերի առնչությամբ։

ՀՀ Ոստիկանության տվյալներով, հանրապետության ընտրատեղամասերում գրանցվել են մի շարք խախտումներ։ Մասնավորապես, ահազանգ է ստացվել քվեաթերթիկների զանգվածային լցոնման, որոշ թեկնածուների վստահված անձանց կողմից տեղամասային հանձնաժողովների գործունեության խոչընդոտման, նախագահի թեկնածուների միջև քաշքշուկների մասին։ Ահազանգերի մի մասը չի հաստատվել։

Ինչպես հաղորդել են ՀՀ վճռաբեկ դատարանի մամուլի ծառայությունից, տեղական ժամանակով ժամը 08։00-ից 20։00 ընկած ժամանակահատվածում Հայաստանի ընդհանուր իրավասության դատարանները ստացել են ընտրական վեճերով 98 դիմումներ, որոնցից բավարարվել է 49-ը։

Մեկնաբանելով նախընտրական շտաբների հայտարարությունների հետ կապված իրավիճակը՝ ԿԸՀ անդամ Կարեն Փոլադյանը հայտարարել է, որ խախտումների մասին ստացված հաղորդագրությունները չեն կարող ազդել Հայաստանի նախագահական ընտրությունների վերջնական արդյունքների վրա։

ՀՀ ԿԸՀ տվյալներով, ժամը 20։00-ի տվյալներով, ՀՀ նախագահական ընտրություններին մասնակցել է 1 միլիոն 642 հազար 057 ընտրող՝ ընտրելու իրավունք ունեցող 2 328 320 անձանցից կամ նրանց 69,25%-ը։

ԿԸՀ ժամը 20։00-ի տվյալներով, ներկայացվել է 5 բողոք, դրանցից 2-ի նկատմամբ հանձնաժողովն արձագանքել է օպերատիվ կերպով, մեկ բողոք փոխանցվել է Գլխավոր դատախազություն, մեկը գտնվում է քննարկման փուլում, մեկ բողոք էլ դեռ չի քննարկվել։

Համաձայն բրիտանական Populus ընկերության կողմից իրականացված exit poll-ի տվյալներով, որը հարցումներ է անցկացրել Հայաստանի 126 ընտրատեղամասերում, 57,01 տոկոսով առաջատարը վարչապետ Սերժ Սարգսյանն է։ Populus-ի նախնական տվյալների համաձայն, երկրորդը ՀՀ նախկին նախագահ Լևոն Տեր-Պետրոսյանն է, որը հավաքել է ընտրողների ձայների 17,04 տոկոսը։

Երրորդ տեղում՝ 14,6 տոկոսով «Օրինաց Երկիր» կուսակցության նախագահ Արթուր Բաղդասարյանն է, իսկ ՀՅԴ թեկնածու Վահան Հովհաննեսյանը չորրորդ տեղում է՝ 5,98 տոկոսով։

Մյուս թեկնածուների հավաքած ձայները չեն անցնում 1,6 տոկոսից։ Հարցումն անցկացվել է Հայաստանի հանրային հեռուստաընկերության կողմից։

Իսկ «Ալյանս» քաղաքացիական նախաձեռնության անցկացրած Exit Poll –ի տվյալներով,առաջատարը ՀՀ առաջին նախագահ Լևոն Տեր-Պետրոսյանն է, որը հավաքել է ձայների 37,7 տոկոսը։ Երկրորդ տեղում  վարչապետ Սերժ Սարգսյանն է՝ 35,4 տոկոսով։ Նրանց հաջորդում են ՕԵԿ նախագահ Արթուր Բաղդասարյանը՝ 15,5%, ՀՅԴ թեկնածու, ՀՀ ԱԺ խոսնակ Վահան Հովհաննիսյանը՝ 6,4%, ԱԺՄ նախագահ Վազգեն Մանուկյանը՝ 2,9%, «Ազգային միաբանություն» կուսակցության առաջնորդ Արտաշես Գեղամյանը՝ 1,3%, Ժողովրդական կուսակցության առաջնորդ Տիգրան Կարապետյանը՝ 1,2%, «Ազգային համաձայնություն» կուսակցության առաջնորդ Արամ Հարությունյանը և ԼՂՀ նախկին արտգործնախարար Արման Մելիքյանը՝ 0,2% ձայներով։

Exit poll-ին մասնակցել է Երևանի և մարզերի 100 ընտրական տեղամասերի 3055 ընտրող։

Ստացված արդյունքների հիման վրա ՀՀ ԿԸՀ-ն որոշում կընդունի նախագահի ընտրության, երկրորդ փուլի անցկացման կամ ընտրությունները անվավեր ճանաչելու մասին։

«Եթե ընտրությունների արդյունքում հայտնաբերվել են այնպիսի խախտումներ, որոնք ազդել են քվեարկության գործընթացի և ընտրությունների արդյունքների վրա, ինչը կորոշվի հանաձնաժողով ստացվող բողոքների և ԿԸՀ անդամների որոշումների հիման վրա, ապա ընտրությունները կարող են անվավեր ճանաչվել»,- ասաց ԿԸՀ քարտուղար Աբրամ Բախչագուլյանը։

ՀՀ օրենսդրության համաձայն, ընտրությունների նախնական պաշտոնական արդյունքները հայտնի կլինեն փետրվարի 20-ին՝ ժամը 20։00-ից ոչ ուշ, իսկ վերջնական արդյունքները՝ քվեարկությունից յոթ օր անց։ --0--

Loading...
Թեմատիկ նյութեր
Բաժնի այլ նյութեր
21:11
17 Նոյեմբերի 2017
Բրազիլիայի ԱԳ նախարարը վերահաստատել է ԼՂ հակամարտության կարգավորման հարցում ԵԱՀԿ ՄԽ–ի ջանքերին սատարելու իր երկրի դիրքորոշումը
ՀՀ նախագահ Սերժ Սարգսյաննընդունել է Բրազիլիայի Դաշնային Հանրապետության արտաքին գործերի նախարար Ալոիզիո Նունյես Ֆեռեյրային:
16:08
17 Նոյեմբերի 2017
Քաղաքագետ Սերգեյ Մինասյանը նշանակվել է Ռումինիայում Հայաստանի դեսպան
Հայաստանի նախագահի հրամանագրով հայտնի քաղաքագետ Սերգեյ Մինասյանը նշանակվել է Ռումինիայում Հայաստանի արտակարգ և լիազոր դեսպան։
20:58
16 Նոյեմբերի 2017
Հայտնի են Հայաստանի և Ադրբեջանի արտգործնախարարների հանդիպման ժամկետներն ու վայրը
Հայաստանի արտաքին գործերի նախարար Էդվարդ Նալբանդյանը կհանդիպի իր ադրբեջանցի գործընկեր Էլմար Մամեդյարովի հետ:
17:14
16 Նոյեմբերի 2017
ԵԽ-ն ընդունել է Արցախի ժողովրդի ինքնորոշման իրավունքը ճանաչող բանաձև. ադրբեջանական սադրանքը տապալվել է
Նախօրեին տեղի ունեցած Եվրոպական Խորհրդարանի լիագումար նիստում ձայների ճնշող մեծամասնությամբ ընդունվել է բանաձև:
20:39
15 Նոյեմբերի 2017
Խաչքարեր և ցուցահանդես. մեկնարկել է Սերժ Սարգսյանի այցը ՌԴ (ՖՈՏՈ)
Հայաստանի նախագահ Սերժ Սարգսյանը ՌԴ նախագահ Վլադիմիր Պուտինի հրավերով աշխատանքային այցով այսօր ժամանել է Մոսկվա:
19:46
15 Նոյեմբերի 2017
Կարեն Կարապետյանը պահպանեց վարչապետի պաշտոնում իր վերընտրման վերաբերյալ ինտրիգը
Հայաստանի վարչապետը չորեքշաբթի պատասխանել է երկրի վարչապետի պաշտոնում իր թեկնածության առաջադրման մասին հարցին։
18:35
15 Նոյեմբերի 2017
Հայտնի են Ռուսաստանի կողմից Թուրքիային 2 մլրդ դոլարի С-400 համակարգեր մատակարարելու ժամկետները
С-400 զենիթահրթիռային համակարգի մատակարարումները Թուրքիային կսկսվեն Անկարայի կողմից այս համաձայնագրով նախատեսված բոլոր վճարումները կատարելուց հետո։
17:26
14 Նոյեմբերի 2017
ՀՀ նախագահն աշխատանքային այցով կմեկնի ՌԴ
Սերժ Սարգսյանը կհանդիպի ՌԴ նախագահ Վլադիմիր Պուտինի հետ:
15:14
14 Նոյեմբերի 2017
Հայկական ԶԼՄ–ները` Լավրովի` Երևան և Բաքու սպասվելիք այցերի նպատակների մասին
Ռուսաստանի արտաքին գործերի նախարար Սերգեյ Լավրովը նոյմբերի 19–ին կայցելի Բաքու, իսկ նոյեմբերի 20–ին` Երևան։
20:24
07 Նոյեմբերի 2017
ՀՀ նախագահ. Եվրոպայի խորհրդի հետ համագործակցությունը բխում է Հայաստանի շահերից
ՀՀ նախագահն ընդունել է ԵԽԽՎ մոնիտորինգային հանձնաժողովի Հայաստանի մասով համազեկուցողներին։
19:54
07 Նոյեմբերի 2017
ՀՀ ԱԳ նախարարը Բենիամին Նեթանյահուին է ներկայացրել ղարաբաղյան հիմնախնդիրը (ՎԻԴԵՈ)
Էդվարդ Նալբանդյանն ու Բենիամին Նեթանյահուն քննարկել են նաև հայ-իսրայելական երկկողմ օրակարգին վերաբերող հարցեր։
17:23
06 Նոյեմբերի 2017
Ֆրանսիան հայերի անկեղծ բարեկամն է. Մակրոն
Նա ընդգծել է նաև, որ Ֆրանսիան լիովին հանձնառու է Արցախի խնդրին բանակցությունների միջոցով մնայուն լուծում գտնելու հարցին: